O LANGI te̱ ńuspepa, wombwa television, to̱so̱ o senga mibia o radio, o me̱ne̱, o senga pe̱ jita la myango m’ebwan, bila, na njo ninde̱ne̱. Pondapo̱ we o taka ońolana we o boa to̱so̱ ná o bo̱lo̱ne̱ ńandolo.

Baise̱ o wame̱ne̱ ná:

• Mo̱, nika nde Yehova a mapuleano̱ mba na mbia mam e?

• We̱ni neno̱ ná na so̱ jongwane̱ o lembe̱ mitakisan mam e?

• Mo̱, musango ma mbale̱ mwe ná mu be̱ buńa bō̱ e?

Bibe̱l e mabola malabe̱ weno̱ ná o dube̱ jombwea mi myuedi.

• Bato ba si me̱nde̱ pe̱ bwa ndutu, duna, to̱so̱ wo̱.​—Bebīsedi 21:4

• “Ńam’boko a me̱nde̱ sobe̱le̱ ka mbudi.”​—Yesaya 35:6

• “Miso̱ ma bandima ma me̱nde̱ wutea.”​—Yesaya 35:5

•  Bawedi ba me̱nde̱ pe̱te̱ timba o longe̱.​—Yohane 5:28, 29

• To̱ moto a si me̱nde̱ pe̱ boa.​—Yesaya 33:24

• Moto te̱ o wase a me̱nde̱ be̱ne̱ tut’a da.​—Myenge 72:16

E me̱nde̱ be̱ lambo di bo̱bi o jo̱nge̱le̱ ná nje o langino̱ o mapapa maboso ma nin kalati ye nde mambo ma ndo̱ti. Nde Loba a kakane̱ ná a mawana man mawengisan o wase son a ponda, Bibe̱l e mabola beteledi ba ne̱ni a me̱nde̱no̱ bola nika.

Nde, Bibe̱l e si mabola buka te̱ beteledi ba nika. E malangwea pe̱ biso̱ nje jangame̱nno̱ bola ná di be̱ne̱ bonam ba mbale̱ na bwane̱ pe̱ longe̱ muńe̱nge̱ tatan. Dutea te̱ jombwea mambo mena ma matakise̱ wa. Pondapo̱ nika ńe ná e be̱ bekwali ba mo̱ni to̱so̱ ba mbia, si be̱ne̱ la ja la bwam, to̱so̱ kwed’a ńandolo. Bibe̱l ńe ná ńongwane̱ wa o lembe̱ min mitakisan, ńe pe̱ ná e lo̱ko̱ wa tongwea na bola wa malabe̱ ma myuedi ka min:

• Ońola nje di matakano̱ e?

• Ne̱ni jeno̱ ná di lembe̱ mitakisan masu e?

• Mo̱, ndabo asu ńa mbia ńe ná e be̱ bonam e?

• Nje e mapo̱ye̱ biso̱ ombusa kwedi e?

• Mo̱, di me̱nde̱ pe̱te̱ je̱ne̱ bandolo basu bawedi e?

• Ońola nje jeno̱ ná di be̱ mbaki ná Loba a me̱nde̱ bola mambo me̱se̱ a kakanno̱ e?

 Langa lo̱ngo̱ la nin kalati di malee̱le̱ ná o mapula o bia nje Bibe̱l e mokwe̱le̱no̱. Nin kalati e me̱nde̱ o jongwane̱ wa. Dongo te̱ di be̱n myuedi mena mi me̱nde̱ jongwane̱ wa o bata so̱ṅtane̱ Bibe̱l. Lodun na lodun la bato lo bwane̱ jakwalisane̱ labu na Mboṅ a Yehova jombwea Bibe̱l muńe̱nge̱. Di pite̱ ná mulemlem pe̱ nde e me̱nde̱no̱ be̱ na wa. Loba a namse̱ wa o ni ponda weno̱ o so̱ nje Bibe̱l e mokwe̱le̱no̱ wa!