NE ÈXLẼ nyadzɔdzɔgbalẽ, èʋu television alo radio la, nya siwo nàse alo nu siwo nàkpɔ dometɔ geɖe ku ɖe hlɔ̃dodo, aʋawɔwɔ kple ŋɔdzinuwɔwɔ ŋu. Ðewohĩ dɔléle alo wò ame vevi aɖe ƒe ku na nèle nu xam.

Bia ɖokuiwò be:

• Aleae Mawu ɖoe be nuwo nanɔ na nye kple nye ƒomea?

• Afi kae makpɔ kpekpeɖeŋu le anɔ te ɖe nye kuxiwo nu?

• Ðe ŋutifafa vavã ava nɔ anyigba dzi gbe aɖe gbea?

Biabia siawo ƒe ŋuɖoɖo siwo ŋu kakaɖedzi le la le Biblia me.

• Amewo magase veve, atsi aku amegã alo nyagã ahaku o.—Nyaɖeɖefia 21:4

• “Bunɔwo ati kpo abe zi ene.”—Yesaya 35:6

• “Ŋkuagbãtɔwo ƒe ŋku aʋu.”—Yesaya 35:5

•  Woafɔ ame kukuwo ɖe tsitre.—Yohanes 5:28, 29

• Ame aɖeke magalé dɔ o.—Yesaya 33:24

• Nuɖuɖu abɔ ɖe anyigbadzinɔla ɖe sia ɖe si.—Psalmo 72:16

Ele bɔbɔe be nàsusui be mɔkpɔkpɔ gbɔlo aɖe koe nu siwo nèxlẽ le axa ʋɛ siwo do ŋgɔ la nye. Gake Mawue do ŋugbe be yeahe tɔtrɔ siawo ava anyigba dzi kpuie eye Biblia la gblɔ ale si wòle esia wɔ gee hã.

Menye nya mawo koe le Biblia me o. Biblia la fia nu siwo wòle be míanya ale be míakpɔ dzidzɔ ahase vivi na agbea fifia gɔ̃ hã mí. Wò ya bu nu siwo nana nètsia dzimaɖi la ŋu kpɔ. Wo dometɔ aɖewo anya nye ganyawo, ƒomekuxiwo, dɔléle alo wò ame vevi aɖe ƒe ku. Biblia ate ŋu akpe ɖe ŋuwò nànɔ te ɖe kuxi siawo nu, eye ate ŋu ana nàkpɔ gbɔdzɔe to biabia siwo gbɔna ƒe ŋuɖoɖowo kpɔkpɔ me:

• Nu ka tae míekpea fu?

• Aleke míawɔ anɔ te ɖe míaƒe kuxiwo nu?

• Ðe dzidzɔ ate ŋu anɔ míaƒe ƒomea mea?

• Nu kae dzɔna ɖe mía dzi ne míeku?

• Ðe míagate ŋu akpɔ míaƒe ame vevi siwo ku la akea?

• Nu ka tae míate ŋu aka ɖe edzi be Mawu awɔ eƒe ŋugbedodowo katã dzi?

 Agbalẽ sia si xlẽm nèle la fia be èdi be yeanya nu si tututu Biblia fia. Agbalẽ sia akpe ɖe ŋuwò. Biabiawo kpe ɖe memama ɖe sia ɖe ŋu, eye biabia siawo akpe ɖe ŋuwò nàse Biblia gɔme nyuie. Edzɔa dzi na ame miliɔn geɖe be Yehowa Ðasefowo nasrɔ̃ Biblia kpli yewo. Míeka ɖe edzi be adzɔ dzi na wò hã. Mawu neyra wò esi nèyi edzi le nu siwo Biblia fia la srɔ̃m!