SE O mani wili niusipepa, sara tivi, se vakarorogo ena retio, o na vakadinata ni sa levu na basulawa, ivalu, kei na vakacaca ni batikadi. De dua e vakamosia voli na yalomu ena gauna qo na tauvimate se na nona takali e dua na wekamu voleka.

E vinaka mo taroga:

• Qo beka na inaki ni Kalou me baleti au kei na noqu vuvale?

• O cei e rawa ni vukei au ena noqu leqa?

• Ena vakilai dina ena dua na gauna na vakacegu?

E veivakacegui na isau vakaivolatabu ni taro qori.

• Sa na sega na mosi, na bula vaqase, kei na mate.—Vakatakila 21:4

• “Ena ladelade na lokiloki me vaka na dia.”—Aisea 35:6

• “Ena rai na matadra na mataboko.”—Aisea 35:5

•  Era na vakaturi na mate.—Joni 5:28, 29

• Ena sega na tauvimate.—Aisea 33:24

• Ena sautu o vuravura ena kakana.—Same 72:16

Ena rairai nanumi ni tadra wale ga na veika e tabaki ena imatai ni vica na tabana ni ivola qo. Ia e yalataka na Kalou ni sa vakarau cakava e vuravura na veiveisau qori, qai vakamacalataki ena iVolatabu na sala ena vakayacora kina.

E levu tale na ka eda na vulica ena iVolatabu. Kena ivakaraitaki, e dusimaki keda ena sala meda marautaka kina noda bula ena gauna qo. Vakasamataka mada na veika e dau vakalomaocaocataki iko. Qori e wili kina na leqa vakailavo se vakavuvale, na tauvimate, se na nona takali e dua na wekamu voleka. E tu ena iVolatabu na ivakasala yaga me baleta na ituvaki qori, ena vakacegui iko tale ga ena isau ni taro va qo:

• Na cava eda rarawa kina?

• Eda na walia vakacava na noda leqa?

• E rawa ni marau na noda vuvale?

• Na cava e yacovi keda nida mate?

• Eda na raici ira tale na wekada voleka era sa takali?

• Eda kila vakacava ni na vakayacora na Kalou na ka kece e yalataka?

 Na nomu wilika na ivola qo e vakaraitaka ni o via kila na ka e kaya na iVolatabu. Ena yaga vei iko na ivola qo. E vakarautaki na taro ni veiparakaravu mo kila vinaka kina na iVolatabu. Era sa vakadinadinataka e vica vata na milioni na yaga ni nodra veitalanoa vakaivolatabu kei ira na iVakadinadina i Jiova. E nuitaki ni na yaga tale ga vei iko. Me vakalougatataki iko mada ga na Kalou ni o vulica na ka e kaya na iVolatabu!