KOĀ a logo e kotou maʼua i sulunale, i televisio ti mo le lātio? Ko agatukipo, ko tau ti mo agamakeke. O toe fenaʼaki mo koutou, lagi e kotou lotomamae o tupu ko se masaki pe ko se tasi kua mate na kotou alofa mamae ki ai.

Kotou fakakaukau ki vesili anei:

• Ko fakatuʼutuʼu ko ia anā a le Atua kiate au mo loku fāmili?

• E mafai ke kau ʼaga o maʼua i fea ni tokoi ke tauʼi ai oku faigataʼaʼia?

• E maʼua loa ko ia i se temi le tokamālie i le kele?

E tou maʼua i le Tosi-Tapu ni tali ki vesili anā.

• E se toe maʼuli mamae loa se tagata, o mātuʼa ti mo mate.—Apokalipisi 21:4

• “E soposopo loa le kito ofaipe se tia.”—Esaia 35:6

• “E mavaa loa a mata o kivi.” —Esaia 35:5

•  E toe fakatuʼuake loa le kau mate ki le maʼuli.—Soane 5:28, 29

• E se toe masaki loa a se tasi.—Esaia 33:24

• E maʼua loa e le tagata le neʼa kai o lasi.—Pesalemo 72:16

E mafai ke kotou manatu ko fakapapau alā e tuʼu i le pāsina 4, mo le 5 o le tosi leinei e lagi ko se moe miti. Kae fakapapau mai e le Atua, kua vave faʼi lana ʼaga o fakasoko. Ti e fakamatala i le Tosi-Tapu pe fefeʼaki lana ʼaga o fakasoko le anoʼaga lenā.

E toe lasi ake a anoʼaga e toe fakasā mai i ai. O fai la, pe fefeʼaki latātou maʼuli fiafia i le temi nei. Kotou manatuʼi a neʼa alā e kotou tuʼania nei ki ai. Pe tupu ko ia ko se masaki? Pe ko faigataʼaʼia fakafāmili? Pe ko faigataʼaʼia fakapaʼaga? Pe ko se tasi kua mate na kotou alofa mamae ai? E mafai ke tokoi atu a le Tosi-Tapu ke kotou ʼaga o tauʼi a faigataʼaʼia fuli anā. E toe soli mai e ia ni tali fakalotofīmālie ki vesili anei:

• Koleā e tou maʼuʼuli mamae ai?

• E fefeʼaki latātou ʼaga o tauʼi otātou faigataʼaʼia?

• E mafai ke fiafia fefeʼaki a lotātou fāmili?

• Koleā e soko i le ʼoki o le mate?

• E tou toe tio loa ko ia i se temi kia lātou alā e tou alofa ki ai kae ku mamate?

• Koleā e mafai ai ke tou tui papau e ʼaga loa le Atua o fakasoko ana fakapapau fuli?

 E kotou lau le tosi leinei, talie e kotou fakasā ai e kotou fia iloa pe koleā e akoʼi mai e le Tosi-Tapu. Ti e tokoi atu loa le tosi leinei ke kotou matala ki ai. Ki palakalafe takitasi e iai a vesili e tokoi atu loa ke kotou matala mālie ki le Tosi-Tapu. Ko ni lauʼi miliona kakai e lotou mālieʼia mokā lotou māsau mo le Kau Fakamāʼoki a Seova o uiga mo le Tosi-Tapu. Ti e motou fakaʼamu foki ke toe mālieʼia e koutou le anoʼaga lenā. Ko ia, ke ʼaga a le Atua o tapuakiʼi a faiga alā e kotou fai ke kotou iloa pe koleā e akoʼi mai e le Tosi-Tapu.