NUAIR a bhíonn tú ag léamh na bpáipéar nuachta, ag breathnú ar an teilifís, nó ag éisteacht leis an raidió, feiceann tú agus cloiseann tú go leor tuairiscí faoi choiriúlacht, sceimhlitheoireacht, agus cogaí. B’fhéidir go bhfuil tú féin ag fulaingt de bharr tinnis nó mar go bhfuair duine éigin a raibh cion agat air bás.

Fiafraigh díot féin:

• An é seo toil Dé dom féin agus do mo chlann?

• Cén áit ar féidir liom cabhair a fháil chun déileáil le mo chuid fadhbanna?

• An mbeidh síocháin ann choíche?

Tugann an Bíobla freagraí sásúla ar na ceisteanna seo.

• Ní bheidh pian, bás, ná seanaois ann feasta.—Apacailipsis 21:4

• “Beidh an bacach ag léimneach mar a bheadh fia ann.”—Íseáia 35:6

• “Osclaíonn sé súile na ndall.”—Salm 146:8

•  Beidh aiséirí ag na mairbh.—Eoin 5:28, 29

• Ní bheidh duine ar bith breoite.—Íseáia 33:24

• Beidh neart le hithe ag gach duine ar talamh.—Salm 72:16

B’fhéidir go gceapfá nach bhfuil sa méid atá ráite sna chéad leathanaigh den leabhar seo ach brionglóid. Ach tá sé geallta ag Dia sa mBíobla go ndéanfaidh sé na hathruithe sin ar an domhan go han-luath.

Déanann an Bíobla níos mó ná sin. Tugann sé eolas dúinn a chabhraíonn linn taitneamh a bhaint as an saol san am i láthair. Smaoinigh ar na rudaí a bhíonn ag déanamh imní duit. B’fhéidir go bhfuil cúrsaí airgid, an teaghlach, drochshláinte, nó bás duine éigin ar chuid acu. Is féidir leis an mBíobla cabhrú leat le dul i ngleic leis na fadhbanna seo, agus sólás a thabhairt duit trí cheisteanna mar iad seo a leanas a fhreagairt:

• Cén fáth a mbíonn muid ag fulaingt?

• Cén chaoi ar féidir linn dul i ngleic lenár bhfadhbanna?

• An féidir lenár dteaghlach a bheith sona sásta?

• Céard a tharlaíonn dúinn nuair a fhaigheann muid bás?

• An bhfeicfidh muid ár mairbh go deo arís?

• Cén fáth ar féidir linn a bheith dóchasach go ndéanfaidh Dia gach atá geallta aige?

 Is dócha go bhfuil suim agat sa méid a mhúineann an Bíobla. Cabhróidh an leabhar seo leat. Tá ceisteanna ar na hailt a chabhróidh leat tuiscint níos fearr a fháil ar an mBíobla. Tá na milliúin duine ag baint taitneamh as a bheith ag déanamh plé ar an mBíobla le Finnéithe Iehova. Tá súil againn go mbainfidh tusa taitneamh as freisin. Go raibh beannacht Dé ort agus tú ag fiosrú céard go díreach a mhúineann an Bíobla!