LÈ OU ka li jounal, lè ou ka gadé télé, lè ou ka kouté radyo, oben lè ou kay asi entèwnèt, sa ou ka vwè, é sa ou ka tann, sé krim, lagè é sa téworis ka fè. É pétèt kè voumenm ou ka soufè pas ou malad, oben paskè ou pèd on moun ou té enmé.

Pozé-w lakèsyon :

• Ès sé sa Bondyé té vlé pou mwen é pou fanmi an mwen ?

• Ola an pé touvé èd pou lité lè an ka jwenn pwoblèm ?

• Ès on jou ké ni lapé asi latè ?

Labib ka réponn a sé kèsyon-lasa, é nou pé fè-y konfyans.

• Pé ké ni moun ka soufè ankò, moun pé ké vyéyi é moun pé ké mò ankò (Révélasyon 21:4).

• « Moun ki ka bwété ké soté kon sèf » (Izayi 35:6).

• Moun-avèg ké vwè klè (Izayi 35:5).

•  Moun ki té mò ké wouviv (Jan 5:28, 29).

• Ponmoun pé ké malad (Izayi 33:24).

• Ké ni manjé pou tann-é-konprann pou toutmoun (Sòm 72:16).

Pétèt ou ka di kè pwomès ki an paj 4 é 5 a liv-lasa, sé yenki an rèv sa pé fèt. Men Bondyé pwomèt kè talè i ké fè sa. Bib-la ka èspliké kijan sa ké réyalizé.

É Bib-la kay pli lwen ankò : i ka di-nou osi ka pou nou fè pou tchè an nou vréman kontan, é pou vi an nou pli bèl dépi aprézan. Réfléchi asi sa ki ka trakasé-w konnyéla la. Pétèt sé santé-la ki pa bon ? Pétèt sé an fanmi-la sa pa kay ? Oben sé pwoblèm a lajan ? Pétèt ou pèd on moun ou té enmé ? Adan dé ka konsa, Labib pé édé-w. I pé konsolé-w osi èvè répons i ka bay pou dé kèsyon kon :

• Poukwa nou ka soufè ?

• Ka nou pé fè douvan on difikilté nou ka jwenn ?

• Ka ki pé rann vi a fanmi an nou pli bèl ?

• Ka i ni apré lanmò ?

• Ès on jou nou ké wouvwè moun nou té enmé é ki mò ?

• Poukwa nou pé sèten kè Bondyé ké fè tousa i pwomèt ?

 Si ou ka li liv-lasa, sé kè ou anvi konnèt ka Labib ka aprann-nou. Liv-lasa ké édé-w. Ni dé kèsyon ki kay èvè sé paragraf-la pou édé-w konprann Bib-la plibyen. Ni plizyè milyon moun ki enmé palé dè Labib èvè Témwen a Jéova. Nou ka èspéré kè sa ké fè-w plézi osi. Nou ka mandé Bondyé béni tout éfò ou ka fè pou dékouvè ka Labib ka aprann-nou !