LÒ OU ka li journal-a, gadé télévizyon-an ouben kouté radyo-a, di kisa yé ka palé ? Yé ka palé di moun ki ka tchwé moun, di lagèr ké térorizm. Pitèt ou menm ou ka soufri paské ou malad ouben paské roun moun ou kontan mouri.

Réfléchi asou sa késyon-yan :

• És a sa Bondjé té lé pou mo ké mo fanmi ?

• Koté mo pouvé trapé èd pou tchenbé rèd anba traka ?

• Ès i ké gen lapè asou latè-a roun jou ?

Labib-a ka bay répons nou pouvé krè asou sa késyon-yan.

• Moun-yan pa ké soufri, yé pa ké divini vyé é yé pa ké mouri ankò (Révélation 21:4).

• « Moun-an ki ka bwété ké kouri kou roun bich » (Isaïe 35:6).

• Sa ki avèg ké rouwè (Isaïe 35:5).

•  Moun mouri-ya ké rouviv (Jean 5:28, 29).

• Pésonn pa ké malad ankò (Isaïe 33:24).

• Tout moun asou latè-a ké gen roun lo ké roun patché manjé (Psaume 72:16).

Pitèt ou ka pansé ki nou pa ké janmen wè promès-ya ki asou paj 4 ké 5 di sa liv-a. Mé Bondjé ka promèt réyalizé sa promès-ya titalò. Labib-a ka èspliké kouman i ké fè sa.

É Labib-a ka fè plis ankò : i ka di nou osi kouman nou pouvé gen tchò kontan dipi aprézan. Sonjé bagaj ki ka bay ou traka. Pitèt ou santé pa bon, ou gen problèm soumaké, problèm annan ou fanmi, ouben ankò roun moun ou kontan mouri ? Labib-a pouvé idé ou tchenbé rèd anba sa traka-ya. Ou tchò ké kontan lò ou ké wè répons Labib-a ka bay asou késyon kou sa-ya :

• Poukisa nou ka soufri ?

• Kisa nou pouvé fè pou tchenbé rèd lò nou gen problèm ?

• Kouman nou fanmi pouvé éré ?

• Kisa ki ka pasé lò nou mouri ?

• Ès roun jou nou ké rouwè moun-yan nou kontan ki mouri ?

• Poukisa nou pouvé sir ki Bondjé ké réyalizé tout promès i fè ?

 Si ou ka li sa liv-a, a paské ou lé savé kisa Labib-a ka anprann nou. Sa liv-a ké idé ou. Pou chak paragraf, i gen késyon ki ké pèrmèt ou konprann Labib-a pi byen. Milyon moun kontan palé di Labib-a ké Témwen Jéova-ya. Nou ka pansé ou menm osi ké pran plézi fè sa. Bondjé ké béni ou pou éfòr ou ka fè pou dékouvri sa Labib-a ka anprann nou !