NGKANA ko wareka te nuutibeeba, ko mataku n te T.V, ke ko ongora n te rerio, ko a nori iai ao n ongo rongorongo aika bati ni kaineti ma te kakeru, te buaka, ao te mwakuri n iowawa. Tao ko rawawata naba ngkoe ibukin te aoraki teuana ke ibukini maten ae e tangiraki iroum.

Titirakiniko ni kangai:

• Aio ae e tangiria te Atua bwa e na riki nakoiu ao nakon au utu?

• N na karekea ia te ibuobuoki bwa I aonga n tokanikai n au kangaanga?

• Iai te tai ae e nang reke iai te rau ni koaua?

Iai n te Baibara kaeka aika karaunano nakon titiraki aikai.

• A nang aki maraki aomata, n rikirake ni kara, ke ni mate.​—Te Kaotioti 21:4

• “E na ewewe te mwauku n aron te ria.”​—Itaia 35:6

• “A na kaureaki mataia aomata aika mataki.”​—Itaia 35:5

•  A na manga kautaki maate.​—Ioane 5:28, 29

• Akea ae e na manga aoraki.​—Itaia 33:24

• A na bati kanaia aomata nako aika n te aonnaba.​—Taian Areru 72:16

E na bae ni kai rio iangoan ae baike ko wareki ni moan iteranibaan te boki aei bon tii taiani kanoa ni mii. Ma e berita te Atua bwa n te tai ae rangi ni waekoa ao e nang karaoi bitaki akanne n te aonnaba, ao e kabwarabwaraa te Baibara aroni karaoan anne irouna.

E bati riki ae e karaoia te Baibara nakon anne. E tuangira baika ti riai n atai bwa ti aonga ni kukurei ni koaua ao n nora kakukurein te maiu ngkai naba. Iangoi moa bwaai ake a karika raraomam. E kona n nanonaki naba n aei te mwane ke baika riiriki n te utu, te aoraki, ke maten ae e tangiraki iroum. E kona ni buokiko te Baibara bwa ko na tokanikai i aoni kangaanga aikai, ao e kona n anganiko te kabebeteaki mani kaekaan titiraki aikai:

• Bukin tera ngkai ti rawawata?

• Ti na kangaa n tokanikai i aon ara kangaanga?

• E kona ni kakukurei ara utu?

• Tera ae e na riki nakoira ngkana ti mate?

• Ti na manga kaitiboo ma raora aika tangiraki ake a a tia ni mate?

• E aera ngkai ti kona n aki nanokokoraki bwa e na boni karaoi bwaai nako te Atua ake e a tia ni beritani?

 Warekan te boki aei iroum, e kaotia bwa ko kan ataia bwa baikara ana reirei te Baibara. E na boni buokiko te boki aei. Iai titiraki ibukin taiani barakirabe aika a na buokiko n ota riki n te Baibara. A a tia aomata aika mirion ma mirion n nora kaungan te maroro n te Baibara ma Ana Tia Kakoaua Iehova. Ti kantaningaia bwa ko na unga naba iai. E bia kakabwaiako te Atua ngkai ko a ataia bwa tera reireiam man te Baibara!