TṌÓ eo bugì níúz pẹpà, ẹ̀b tv, àbèè ge pãané tṍ ló lédiò, ò monì vaá dã́ gbò kpẹ̀a ea kil ló tã̀àgã̀, bé gím, nè gbò nu pọ̀. Be à sẹlẹ, olo gé mon tã̀àgã kèbá zọ̀ kpá ló, àbèè kọọ̀ nen eo vulè beè ù.

Bĩiná o bá kọọ̀:

• É kọọ̀ níì nú e Bàrì gbĩ́ kọ á naaá ló nda nè pá nà tọ ẹ́?

• Ãàe ní eḿ láá mòn nvèè bá ea é náa kọ ḿ láá emá nà gbò tã̀àgã̀e?

• É kọọ̀ kà kà fẹ́ẹ́-fẹẹ̀ ló é beè dì gé?

Kpá Káí palàge nè ààla eo é agàla boo kilma ló nakà gbò bíbvá.

• Gbò nen náa é kpáá ié ná nyaa ló, bọọ ana, àbèè ge ù.—Kùùà Nù 21:4

• “Gbò kọ̀và é pẹ́gi belí gbám.”—Àìzáíà 35:6

• “Gbò gímá dẽe é mon nu.”—Àìzáíà 35:5

•  Gbò e ba beè ù é kẽeà bã mm̀ dùm.—Jọ́ọ̀n 5:28, 29

• Kpáló tọ́ọ̀ nen náa é zọ nà.—Àìzáíà 33:24

• Kọ̀láá nen ea di boo kunukẽ̀í é íe gã́bug gyã́á ge dè.—Psalm 72:16

Àé láá valí gè bugi togó kọọ̀ gbò nú e beè bugi boo túá kà náásĩ́ kpáíá beè pọ́ì gyáálá. Sõò Bàrì beè zìgà kọọ̀ gbò nyààaá é nááá boo kunukẽ̀í pọ́ì ńkem̀ tṍó àla, vaá Kpá Káí baatẽ́ bé ea é náa naa.

Kpá Káí náa èlmà áá kóló vóá. À kọ́ nú ea bọ́ló kọ é nyimá kọbé è láá dé kpéè ló dùm vaá ié kà kà ẹ́ẹ́-ẹẹ̀ nyíe kátogóí. Zẹ́ẹ́ ni tú pọ́ì ńkem̀ tṍó bùgmà togó boo gbò nú ea ólò tãagẽ́ ni. Gbò níí gé láá dú bíì kpègè àbèè tã̀àgã̀ pá tọ, zọ̀ kpáló, àbèè ge kọọ̀ nen eo beè vulè ú. Kpá Káí é láá nvèè bá nè ni naa ní eo é láá emá gbò tã̀àgã̀í, vaá àé láá nvèè ni nyíé gbàà tení dú ló ge aalá gbò bíb ea kọ́ọ̀:

• Éé ní ea náa è mòn tã̀àgã̀e?

• Mósĩ́ deè ní eé láá ĩ̀ìmà kèbá bẹẹ tã̀àgã̀e?

• É kọọ̀ pá bẹẹ tọ é láá ié ẹ́ẹ́-ẹẹ̀ nyíe?

• Éé ní ea náaí ló tṍó e úù e?

• É kọọ̀ èé láá kpáá mòn gbò e beè vùlè e ba beè ù?

• Éé ní ea náa èé láá àgala boo kọọ̀ Bàrì é ḿm̀-mè kọ̀láá kà nú ea beè zìgà ẹ?

 Ge kọọ̀ ò gé bugi nakà kpáí zógè kọọ̀ ò gbĩ́ì ge nyimá ló nú e Kpá Káí nóòmà. Nakà kpáí é nveè bá nè ni. À íe bíb ea di kè kẽè buù kpò, ea é nveè bá nè ni kọ ó dã́tẽ́ ló Kpá Káí leevè. Gã́bug gãà gbò nen a dé kpéè ló ge zọ̀ Gbò Neǹ Ditõ̀ò Jìhóvà loá sọ́l boo Kpá Káí. È bulà kọọ̀ àé léémá nágé olo. Bàrì á tãanè ni dee bá tṍó eo monì nú e Kpá Káí é láá noòmà ni!