Ə́ MA wɛlɛɛ hɛɓɛ lɔpee ɓo, ə́ televiziɔn hu kaa awala kɛtii ə́ aladio woo mɛn, wɛlɛɛwoo ɲɔnwɔɔɠaa lɔ ɓə ya kɛ mɛn ɉii yɛ pələi paaɓo kaa la, kɔ da kɛɛ kalaa. Ə́ kaa kiɛ mɔnɔ mɛɛi ɲɔn ɲəi awala kɛtii ə́ wɛlikɛmaamun da aa haa.

Ə́ kpɔɔ maaləngɛ :

• Akɛtii yili ɓə Yálá ə kɛ bɔ máámɛni hu, da ɲə́i bɛlɛn nua ?

• Minɛ ɓə ŋa pɛli kpɔnmaa hɔlɔɓoi laa gɛ́ pɛli máámɛniɠaa ŋɛi kulɔi ?

• Liilaa kaa mɔɔn pai kɛi lɔi mɛi a holo ta ?

Biblə a gɛɛmaalənŋaa ŋɛi mukulɔ.

• Nukanŋaa di ho kea pai mɔnɔ mɛɛi, di ho kea pai pɔlɔi ə lɛɛ di ho kea pai kɛi haai (Kulɔ ponoŋa 21:​4).

• “ Naalowai, nui gɔwɔ ho ɲəi, gaa pai kɛi gilɛ həɠəi yɛ loma ” (Izai 35:​6, TMN).

• “ Naalowai, ɲɛipunua kaa pai kɛɛ kaai ” (Izai 35:5, TMN).

•  Haaɓəlaa kaa pai nwun ɉii (Záán 5:​28, 29).

• Nuta lɔpee ho kea pai ɲɔn gɛi (Izai 33:​24, TMN).

• Kɔnɔn gaa pai kɛi lɔi mɛi kpɔ kɛnɛ (Somə 72:​16, TMN).

Hó ə́ kiliŋahiɛ yɛ́ kɛ ma mɛniɠaai baazə 4 da 5 di ŋa di ho ɓaa a teɲa. Yálá aa mo yɛ gaa pai di kɛi, ə lɛɛ pələi gaa pai gɛi la, Biblə a ɉukulɔ.

Kəlaa yili lɔ hwəi Biblə a mo. Pələi gwa pɛli yɛnɛɛ ɲaanɛɛ hɔlɔɓoi la háákələi, Biblə a ɉukulɔ. Ə́ kiliŋahiɛ lɔ woloɓo mɛniɠaa di kaa ə́ liihɛlɛn ɉii diɛ : wali mɛni ŋɔ liihɛlɛn, pɛlɛn ɲii ŋɔ liihɛlɛn, ɲɔn, awala kɛtii ə́ wɛlikɛmaamun da aa haa. Biblə a pɛli ə kpɔnmaa tɛɛ ə́ pɔ háákələi, ə gɛ ə́ lɛɛ a ə́ hwaŋalɔɔ mɛniɠaa tii hu. Ya pɛli liilaa hɔlɔɓoi gɛɛmaalənŋaa ŋɛi mukulaa hu :

• Lə mɛni ɓa gwa mɔnɔ mɛɛ ?

• Gwa hwaŋalɔ hɔlɔɓo ləi gu wɔ liihɛlɛn mɛniɠaa hu ?

• Lə ɓə a pa a pɛlɛn ɲii lɛlɛɛ ?

• Lə ɓə a tɛɛ nu haa pulu ?

• Gu wɛlikɛmaanuai daa haa, gu kaa pai pənəi mɔɔn gu di kaa ?

• Gwa laa ləi na a gbɔkpɔ akɛ Yálá kaa pai ŋɔ mɛni laakwəlamoɔɠaa laahwɛɛi ?

 Ɉɛɓɛi ŋɛi kɛ mɛni ə́ yəi yɛ́ mo, a nɛ yɛ ma yii Biblə a galan ə́ kaa bɔ ə́ ɲaakaa. Ɉɛɓɛi ŋɛi kaa pai kpɔnmaa tɛɛi ə́ pɔ. Ə́ kili lɛɛ ɉu yɛ́ ma gɛɛmaalənŋaa ŋɛi di kaa ɉɛɓɛ kɔwɔla di mukulaɠaa da hɔlɔɓo balagalafəɠaa hu ə lɛɛ da kpɔnmaa tɛɛ ə́ pɔ yɛ́ Biblə ɲaakaai. Pələi Zehova ŋɔ Kəlaɠaa da Biblə kalan na nua diɛ, yili aa nu miliɔn damaa kwəinɛɛ. Ku laana kuɔ ma yɛ́ kpɛli ə́ kwəi kaa pai nɛɛi. Mɛni tamaa ŋɛi ə́ kaa maakwɛlii, Yálá ə lúwɔ́ too yɛ́, yii Biblə a galan guɔ, yɛ́ pɛli gɔlɔn ɉii !