AKÜJÜNÜSÜ maʼin süchiki kasa mojusü suluʼupünaa periódico, telewisoot, raawia jee Internet, shia aküjünaka maʼin achiki atkawaa otta müliain maʼin wayuu sutuma susoteʼennüin wonpa. Eesüjaʼa müliale paaʼin maaʼulu sutuma ayuulii jee sutuma nünaajaain wanee püpüshi.

Püsakira paaʼin sünain tüü:

• ¿Nücheküinche Maleiwa müliain taya otta müliain tapüshi?

• ¿Jalasü aküjünüin tamüin tü taaʼinrüinjatkat süpüla tachecherüin taaʼin soʼunnaa kasa mojusü?

• ¿Eejeetche jimataa aaʼin saaʼu tü Mmakat mapeena?

Aküjünüsü tü shiimainkat süchiki tia pütchikalüirua suluʼu tü Wiwüliakat.

• Nnojoleerü müliain, laülaain jee outuin wayuu (Alateetkat Mapeena [Apocalipsis] 21:4).

• «Türüttaʼain müinjachi chi masaʼasaikai maʼaka naaʼin wanee irama» (Isaías 35:6).

• «Koʼujeena na moʼusaliikana» (Isaías 35:5).

•  Asoʼiraajeerü saaʼin tü wayuu outusükalüirua (Juan 5:28, 29).

• Nnojoleerü eein ayuulii (Isaías 33:24).

• Jouleerü eküülü sümüin wayuu süpüshuaʼa (Salmo 72:16).

Eesüjaʼa nnojorüle punoujain sünain tü paashajeʼerakat suʼttiajee karaloʼutakat tüü. Nikeraajeetpejeʼe Maleiwa tia yaa saaʼu tü Mmakat otta süküjain wamüin tü Wiwüliakat tü sukuwaʼipainjatkat nutuma.

Süküjain tü Wiwüliakat tü waaʼinrüinjatkat süpüla talatüin waaʼin maaʼutpünaa. Eesüjaʼa shapaale paaʼin sutuma mojujiraain pia sümaa püpüshi, nnojoluin nneerü pümaʼana, ayuulin pia jee mojule paaʼin sutuma nünaajaain wanee püpüshi. Mayaapejeʼe müin tia, süküjain tü Wiwüliakat tü paaʼinrüinjatkat süpüla püchecherüin paaʼin soʼunnaa tü kasa mojusü alatakat pümüin. Otta amülialaajeerü paaʼin sutuma tü sümakat tü Wiwüliakat süchiki tüü:

• ¿Jamüsü müliaka wayuu?

• ¿Kasa waaʼinrüinjatka süpüla wachecherüin waaʼin soʼunnaa tü kasa mojusü alatakat wamüin?

• ¿Kasa waaʼinrüinjatka süpüla talatajiraain waya sümaa waʼwayuuse otta wachonnii?

• ¿Jalamüinsüche oʼunuin naaʼin wanee wayuu outapa nia?

• ¿Weʼreenache nachikuaʼa na wapüshi outakana?

• ¿Jamüsü watüjaaka saaʼu nikeraajeerüin Maleiwa tü nümakat?

 Paashajeʼerüin karaloʼutakat tüü süka pütüjaweein saaʼu tü süküjakat tü Wiwüliakat. Puunteerü tia sükajee karaloʼutakat tüü otta sükajee tü asakinnakalü anain sünain. Wainma wayuu anaka amüin aashajawaa süchiki tü Wiwüliakat namaa na aküjaliikana pütchi nüchiki Jeʼwaa. Anasüjeʼe kamalainre pümüin tiaʼaya. Kasataalejeseʼe nükaalinjain pia Maleiwa süpüla pütüjaain saaʼu tü süküjakat tü Wiwüliakat.