JAHECHA térã ñahendúramo umi notísia osẽva rrádio, diário ha télepe, ivaívante jahecha. Hetaiterei oĩ mondaha, terrorísta, gérra ha violénsia. Ha ndahaʼéi umíva añónte, oĩ avei heta mbaʼasy, ha ikatu oime nde voi resufri hína umíva káusare térã omanógui ndehegui peteĩ rehayhúva.

Upévare oiméne reñeporandu:

• ¿Péichante voi piko Ñandejára oipota jaiko?

• ¿Mbaʼépa ikatu chepytyvõ ambohovái hag̃ua umi provléma arekóva?

• ¿Jaikóne piko pyʼaguapýpe algún día?

La Biblia orresponde koʼã pregúnta.

• Ndaiporimoʼãvéima hasýva, ituja, ig̃uaig̃ui térã omanóva (Apocalipsis 21:4)

• Umi oguataʼỹva guasúicha odiparáta (Isaías 35:6)

• Umi isiégova ohecha jeýta (Isaías 35:5)

•  Umi omano vaʼekue oikove jeýta (Juan 5:28, 29)

• Opáta mbaʼasy (Isaías 33:24)

• Pe yvy oprodusi porãitereíta ha ndofaltamoʼãi hiʼupy (Salmo 72:16)

Ikatu oime repensa iporãitereiha umi mbaʼe oĩva ko lívro oñepyrũvo, péro nderegueroviái la oñekumplíne hag̃ua. Péro Ñandejára opromete ñandéve koʼẽrõitéma okumplipaitetaha koʼã mbaʼe, ha la Biblia omombeʼu ñandéve mbaʼéichapa ojapóta upéva.

Péro ndahaʼéi koʼã mbaʼénte la Biblia omboʼéva. Síno omombeʼu avei ñandéve mbaʼépa jajapo vaʼerã ikatu hag̃uáicha koʼág̃ama voi jaiko vyʼápe. Epensamína sapyʼaite mbaʼépa hína umi mbaʼe ndepyʼapýva koʼág̃a. Ikatu oime rejepyʼapy ne famíliare, nde salúre, plátare, térã omano ndehegui peteĩ rehayhúva. La Biblia ikatu nepytyvõ rembohovái hag̃ua umi provléma, ha tuichaiterei nembopyʼaguapýta reikuaávo mbaʼéichapa okontesta koʼã pregúnta:

• ¿Mbaʼérepa jasufri?

• ¿Mbaʼéichapa ikatu ñambohovái umi provléma jarekóva?

• ¿Ikatúpa jaiko vyʼápe ñande rogapýpe?

• ¿Mbaʼépa oiko umi omano vaʼekuégui?

• ¿Ikatúne piko algún día jahecha jey umi ñane hénte ha ñane amígo omano vaʼekuépe?

• ¿Mbaʼérepa ikatu jaguerovia Ñandejára okumplipaitetaha umi mbaʼe opromete vaʼekue?

 Releévo ko lívro rehechauka hína reikuaaseha mbaʼépa omboʼe la Biblia, ha ko lívro katuete nepytyvõta upearã. Umi párrafo guýpe oĩ umi pregúnta nepytyvõtava rentende porãve hag̃ua la Biblia. Hetaiterei hénte vyʼápe oaprende hína testígo de Jehovándi la Biblia omboʼéva. Hiʼãite oréve nde avei rejapo upéicha. Ñandejára tanepytyvõ resegi hag̃ua reikuaave umi mbaʼe haʼe nemboʼéva Iñeʼẽ rupive.