REMONGETA yave periódico, remae televisión ani reendu yave radio, reecha jare reendu oime jeta ikavimbae vae, ñeraro jare oporoyuka vae. Ipuereko reiporara mbaerasɨ ani ndepɨatɨtɨ nerëtara omano yave.

Eparandu ndeyeupe:

• ¿Oipotara Tumpa kuae cheveguarä jare cherëtara reta peguarä?

• ¿Kiapepa chepuere aväe yemborɨ amomara vaerä yemboavai reta anoi vae?

• ¿Oimetara pɨakatu añetete vae?

Biblia omboyevɨ kavi kuae marandu reta.

• Ngaraama kia imbaerasɨ, indechi, ani omano (Apocalipsis 21:4).

• “Iköcho vae reta oporiseta guasukaka rami” (Isaías 35:6).

• “Jesambae reta omaeta” (Isaías 35:5).

•  Omano vae reta oikoveyeta (Hechos 24:15).

• Ngaraama kia ave imbaerasɨ (Isaías 33:24).

• Oimeta jeta tembíu opaete peguarä (Salmo 72:16).

Ipuereko remopiensa mbaetɨta oyeapo kuae tupapire iyɨpɨpe remongeta vae. Ërei michiñoma oata Tumpa oyapo vaerä jae jei vae ɨvɨ peguarä jare Biblia omoësaka këraita oyapo.

Biblia yandemborɨvi ïru mbaere. Yandemboe ñamonecesita vae yaiko vaerä yerovia reve jare yaiko kavi vaerä añave rupi. Emopiensa reyemoambeko vaere. Ipuereko reyemoambeko korepotire ani nerëtarare, mbaerasɨre ani nerëtara omano yave. Biblia ipuere ndemborɨ remomara vaerä kuae mbaeavai reta jare ipuere omee ndeve pɨakatu omboyevɨ yave marandu reta kuae rami:

• ¿Maerapa yaiporara?

• ¿Këraipa yandepuere ñamomara mbaeavai reta ñanoi vae?

• ¿Ipuerepa ñanerëtara oiko yerovia reve?

• ¿Mbaepa oasa yande ndive ñamano yave?

• ¿Yaechayetara ñanerëtara reta omano vae?

• ¿Maerapa yarovia Tumpa oyapota opaete jei vae?

 Kuae ñeerɨru remongeta reï yave reechauka reipotako reikuaa Biblia omboe vae. Kuae ñeerɨru ndemborɨta. Oime marandu párrafo reta peguarä, ndemborɨta reikuaa kavi vaerä Biblia. Jeta yae kia reta oyerovia reve imiari Bibliare testigos de Jehová ndive. Jökoraiñovi ndepuere reyapo. ¡Tumpa tomae nderé reyemboe ramboeve Bibliare!