-BHO -man sea -manɩanˈ -sɛɛ ˈdhii zro, -man sea kpajhriɛdhebha iˈjhe, -man sea radio dheinˈˈ bho po ɛˈ, ˈˈkudhbhaa- -e tʋ -e dhɩsaɩn- anˈ ˈsʋ ɔˈ dɩ ɲʋn an ˈtmʋn. Ɛgwɛ -manˈ ˈˈjɛ -nɩɛn- seaaˈ, bhɛ se ˈghwɛ ɛˈ dɩ nɩn- ɛnˈ, -ˈmɛn -manˈ ɲɔn ɔnˈ ˈmɛan anˈ dɩ.

Dee- -manˈ ˈˈjɛ dɩ nɩn in:

• ˈKamɔn- Ɲɔnsoa a ˈbɔn ˈmɔn -e ˈman ˈˈgbuzɔncɛ ɛˈ ˈkmʋn ˈye -nɩn?

• -Bho ˈman sa ˈkle ˈjhe ɛˈ, da ˈye sʋnbhopoɛ- ˈjhee- -ɛ?

• Kupeɛideɛ- ɛ mun da ˈbhlʋa ˈˈkpe -nɩn ˈmɛn?

Biiblʋ a za ˈe dɩ nɩn ˈmɛn.

• Ɲɔn ˈse ˈghwɛ ˈkpa- i, ɲɔn se geaˈˈ ˈkpa- i, ɲɔn ˈse ˈmɛn- in dheeˈka.—Gbɔˈwlʋdhɩ- 21:4

• “Ɲɔn -ɔn -ˈtoa a, ɔɔ muɛn -delɔ- ɔˈ dhɩ jhai ˈjha sʋn ˈbhle-.”—Isaïe 35:6

• “Ɲʋn -ˈˈdhɔa a, ʋaˈ ˈˈjhria muɛn ˈgbai-.”—Isaïe 35:5

•  Ɲʋn -ˈmɛan an, ʋa muɛn ˈkmʋndhejhi-.—Zan 5:28, 29

• Ɲɔn ˈse ˈghwɛ ˈkpa- i dheeˈka.—Isaïe 33:24

• Ɲʋn anˈ klɛɛ nɩan da ˈbhlʋa ˈˈkpe ɛ, ʋa muɛn dhiidhɩ- -duuˈˈ ˈbhle-.—Psaume 72:16

Dhɩ -ˈjhea ˈdhe ˈsɛɛ nɛn ɛnˈ -deenanˈ an, ɛgwɛ ˈbho- -gwlɩˈˈ ɛ, ɩn se ˈbhɛɛ- ɩn ˈye -nʋɛn-. ˈKlaa Ɲɔnsoa cɛn ghlu, ɔ ˈnaan ɔɔ muɛn dhɩ -ˈnɩn anˈ klɛɛ nʋn- da ˈbhlʋa ˈˈkpe ˈdhe nɔnˈˈ -dhɛ ˈˈzaan ˈdhi. -Ka ɔ ˈyea ɩanˈ nʋn sʋn nʋn -ke ɛ, Biiblʋ a ˈtmʋɛnˈ.

Biiblʋ a ˈtmʋɛn dhɩ -duuˈˈ aˈ dɩ -kenɛnˈ. -Ka -a -ˈyea nʋn -wɛeˈ -aaˈ ˈkmʋn ˈyea ˈmʋnanˈ inɩn- ˈzɩan an, ɛmɛn- ʋan tɔɔn -aʋ. -ˈBhɛɛˈ -ˈye -manˈ ˈkledɩ ˈbhle. Ɩn ˈbhɛɛˈ ɩn ˈye ˈghwɛi dɩ -e ˈˈgbuzɔnˈ dɩ -e ˈghwɛ -e -manˈ ɲɔn ɔnˈ ˈmɛan anˈ dɩ nɩn-. Biiblʋ ˈbhɛɛˈ ʋn ˈye -ʋn sʋn bho po -ˈye ˈkledɩ- -ˈnɩn ˈˈdhru ˈjha. Ʋn ˈbhɛɛˈ -ke ʋn ˈye -ʋn sʋn bho po -ˈye ideedɩ- nɩn anˈ ˈdhezaaˈ ˈjhe:

• Dhɛɛdɩ- -aaˈ ˈklejheɛ -di ka -a?

• Da ˈye sʋnbhopoɛ- ˈjhee- -ɛ?

• Ka ˈye nʋn -wɛeˈ ˈye -bɔyaˈˈ ˈjhe ˈdhee bho ˈˈgbuzɔn -ɔn?

• -Bho ɲɔn ˈmɛn ɛnˈ, dɔɔ mun -ɛn?

• -Aaˈ ɲʋn -ˈmɛan an, ʋa mun ˈkmʋndhejhi- ˈmɛn?

• Dhɩ aˈ klɛɛ -ɩanˈ ghlu Ɲɔnsoa cɛan an, dhɛɛdɩ- -a -ˈyɩ -gwlɩˈˈ de -ɛ?

 -Bho -man sea ˈsɛɛ- nɛn ˈdhii zro ɛˈ, -ˈmɛn dhɛ Biiblʋ a tɔɔan ɲʋn ɛn, -man ˈbɔn -ˈyeɛ jhibho-. Ɛ ˈbhɛɛˈ ɛ ˈye -ʋn sʋn bho po. Ideedɩ- nɩan ˈo ˈcɩaandhɛ ˈɛ kpɛ ˈzɔn ɔn, ɩan muɛn -ʋn sʋn bho -po -ˈye dhɛ Biiblʋ ˈtmʋan iˈŋwɔn -kajɔɔnka. Ɲʋn -duuˈˈ -nɩn Zoova aˈ -Bobhlaʋn- an ˈcɩan Biiblʋ ˈˈdhe -ʋa- -ˈjheeɛ ˈmʋnan ˈdhi. -A -ˈjhean ˈmɛn, ɛɛ muɛn -ʋn -gwliinmɔɔn- -ke. Ɲɔnsoa po -ʋn ˈdhiman -wɛeˈ dhɛ Biiblʋ a muan -ʋn -tɔɔn ɔn, -ˈyeɛ iˈŋwɔn!