KUKWE blo nuainta, nitre tä ni mada murie kete kä jürä ngwankäre nibätä aune rü nuainta yebätä käre kukwe mikata gare periódico, televisión, radio aune Internet yete. Mätä bren o mä mräkä tare mäkwe krütani yebätä mätä ja tare nike arato raba ruin nuen.

Ngwentari jai:

• ¿Ngöbö tö kukwe ne erere ie ti aune ti mräkä kräke?

• ¿Medente kukwe raba kwen tie ti dimikakäre ja tuin kukwe kri yebe?

• ¿Nikwe nünain jäme jabe Kä tibienbätä ya?

Biblia tä kukwe ye mike gare metre abokän ie ni raba tö ngwen.

• Ni ñaka rabaira ja tare nike, nemen umbre aune krüte (Apocalipsis 21:4)

• “Ni ngüre bren ye rabai ja täkete kuin bura kwrere” (Isaías 35:6)

• “Nitre ie kä ñaka tuin yei kä rabai tuin” (Isaías 35:5)

•  Nitre krütani gaikröta (Juan 5:28, 29, TNM)

• Ni ñaka rabai jire bren (Isaías 33:24)

• Mrö rabai ni jökrä kräke (Salmo 72:16)

Tärä nebätä página käne yekänti kukwebätä mäkwe ñäri ye ñaka raba nemen bare mä raba nütüre. Akwa Ngöbö köböra kukwe ye erere nuainne Kä tibienbätä käbämikata kwe aune nuaindi ño kwe ye Biblia tä mike gare.

Arato nikwe dre nuaindre nünankäre kä jutobiti kä nengwane ye Biblia tä niere nie. Dre dre tä mä mike töbike yebätä töbike. Mä mräkä, ngwian o bren yebätä kukweta mä kisete. O mä mräkä tare mäkwe krütani yebätä mätä ulire raba ruin nuen. Biblia raba mä dimike ja tuin kukwe yebe. Arato raba mä töi mike jäme, ñan ñobätä aune tä kukwe ngwantarita ne mike gare:

• ¿Ñobätä nita ja tare nike?

• ¿Kukwe kri tä nemen ni kisete yebe ni raba ja tuin ño?

• ¿Nikwe dre nuaindre nünankäre kä jutobiti ni mräkäbe?

• Nitre tä krüte ye ngwane, ¿dreta nemen bare bätätre?

• ¿Ni mräkä tare nikwe krütani nikän ye nikwe tuaita ya?

• Ngöböta kukwe käbämike ye jökrä mikai nemen bare kwe, ¿ye ñobätä ni raba tö ngwen ie?

 Mätä ñäke tärä nebätä ngwane, Biblia tä dre driere ye mä tö mikai gare jai yebätä mätä ñäkebätä. Tärä ne mä dimikai kukwe ye mike gare jai. Párrafo ketare ketare kräke kukwe ngwantarita yekwe mä dimikai Biblia mike nüke gare bäri kwin jai. Nitre kwati krubäte tä blite Bibliabätä nitre testiko Jehovakwe ben ye käi nemen juto krubäte bätätre. Ye erere ja rabadre ruin mäi ie nun tö. ¡Biblia tä dre driere nie ye mätä ja di ngwen mike gare jai yebätä Ngöbökwe kukwe kwin mikadre nemen bare mä kräke ie nun tö!