KON magbasa ka sing pamantalaan, magtan-aw sing TV, ukon mamati sa radyo, makita kag mabatian mo ang mga balita parte sa krimen, inaway, kag terorismo. Basi ikaw mismo nagaantos sa balatian ukon sa pagkapatay sang imo pinalangga.

Pamangkuta ang imo kaugalingon:

• Amo bala ini ang gusto sang Dios para sa akon kag sa akon pamilya?

• Diin ako makakita sing bulig sa akon mga problema?

• Matabo pa ayhan ang matuod nga kalinong?

May makalilipay nga sabat ang Biblia sa sina nga mga pamangkot.

• Ang mga tawo indi na magbatyag sing kasakit, magtigulang, ukon mapatay.—Bugna 21:4

• “Ang mga piang magalukso kaangay sang usa.”—Isaias 35:6

• “Ang mga mata sang mga bulag makakita.”—Isaias 35:5

•  Buhion liwat ang mga patay.—Juan 5:28, 29

• Wala na sing magamasakit.—Isaias 33:24

• Madamo na sing pagkaon para sa tanan.—Salmo 72:16

Basi pamensaron mo nga ang mga nabasahan mo sa una nga mga pahina sini nga libro damgo lamang. Pero nagpromisa ang Dios nga malapit na lang niya himuon ini nga mga pagbag-o sa duta, kag ginapaathag sang Biblia kon paano niya ini himuon.

Pero indi lang amo sina ang ginasugid sang Biblia. Ginasugiran man kita sini kon paano kita mangin malipayon subong. Pamensara sing makadali ang imo mga ginakabalak-an. Mahimo nga parte ini sa pamilya, sa panglawas, ukon sa pagkapatay sang imo pinalangga. Makabulig sa imo ang Biblia nga maatubang ini nga mga problema, kag mapaumpawan ka sang sabat sini sa mga pamangkot pareho sang:

• Ngaa nagaantos kita?

• Paano naton maatubang ang aton mga problema?

• Puede bala mangin malipayon ang aton pamilya?

• Ano ang matabo sa aton kon mapatay kita?

• Makita pa bala naton ang aton napatay nga mga pinalangga?

• Ngaa makasalig kita nga tumanon sang Dios ang tanan niya nga promisa?

 Ang imo pagbasa sini nga libro nagapakita nga gusto mo mahibaluan ang ginatudlo sang Biblia. Makabulig sa imo ini nga libro. Ang mga pamangkot sa kada parapo makabulig sa imo nga maintiendihan pa gid ang Biblia. Minilyon ang nanamian sa pagbinagbinag sang Biblia upod sa mga Saksi ni Jehova. Tani ikaw man. Kabay nga mabaton mo ang pagpakamaayo sang Dios samtang ginatun-an mo kon ano ang ginatudlo sang Biblia sa imo!