ԹԵՐԹ կարդանք, հեռուստացույց դիտենք, թե ռադիո լսենք, ամեն տեղ վատ լուրեր են՝ հանցագործություն, պատերազմ, ահաբեկչություն։ Հնարավոր է՝ ինքդ էլ տառապանքներ ես կրում հիվանդության կամ հարազատի մահվան պատճառով։

Հարցրու ինքդ քեզ.

• Մի՞թե սա էր Աստված ուզում իմ ու իմ ընտանիքի համար։

• Խնդիրներս հաղթահարելու համար որտե՞ղ կարող եմ օգնություն գտնել։

• Երբևիցե երկրի վրա խաղաղություն կլինի՞։

Աստվածաշունչը հստակ պատասխանում է այս հարցերին։

• Մարդիկ այլևս չեն տառապի, չեն ծերանա և չեն մահանա (Հայտնություն 21։4)

• «Կաղը եղջերուի պես կցատկոտի» (Եսայիա 35։6)

• «Կույրերի աչքերը.... կբացվեն» (Եսայիա 35։5)

•  Մահացածները նորից կապրեն (Հովհաննես 5։28, 29)

• Ոչ ոք չի հիվանդանա (Եսայիա 33։24)

• Բոլորը առատ ուտելիք կունենան (Սաղմոս 72։16)

Թերևս մտածես, որ այս գրքի առաջին էջերում գրվածները ուղղակի երազանք են, բայց Աստված խոստացել է, որ շատ շուտով անելու է այդ փոփոխությունները, և Աստվածաշնչում ասվում է, թե նա ինչպես է դա անելու։

Աստվածաշունչը ուրիշ բաների մասին էլ է խոսում։ Այնտեղ ասվում է, թե ինչ կարող ենք անել, որ արդեն այսօր երջանիկ լինենք և վայելենք կյանքը։ Մի պահ մտածիր, թե ինչն է քեզ ցավ ու անհանգստություն պատճառում։ Գուցե ունես ֆինանսական և ընտանեկան խնդիրներ, վատ առողջություն կամ էլ հարազատ ես կորցրել։ Աստվածաշունչը կարող է օգնել, որ հաղթահարես քո խնդիրները և մխիթարություն գտնես։ Այն պատասխանում է հետևյալ կարևոր հարցերին։

• Ինչո՞ւ ենք տառապում։

• Ինչպե՞ս կարող ենք պայքարել մեր խնդիրների դեմ։

• Ինչպե՞ս կարող ենք ունենալ երջանիկ ընտանիք։

• Ի՞նչ է լինում մահից հետո։

• Երբևիցե կտեսնե՞նք մեր մահացած հարազատներին։

• Ինչո՞ւ կարող ենք վստահ լինել, որ Աստված կանի այն ամենը, ինչ խոստացել է։

 Այն փաստը, որ կարդում ես այս գիրքը, ցույց է տալիս, որ ուզում ես իմանալ, թե ինչ է սովորեցնում Աստվածաշունչը։ Այս գիրքը կօգնի քեզ այդ հարցում։ Բոլոր պարբերությունների համար կան հարցեր, որոնք օգնում են ավելի լավ հասկանալ Աստվածաշունչը։ Միլիոնավոր մարդիկ Եհովայի վկաների օգնությամբ ուսումնասիրել են Աստվածաշունչը և մեծ բավականություն են ստացել։ Հուսով ենք՝ ուսումնասիրությունը քեզ էլ դուր կգա։ Թող Աստված օրհնի ջանքերդ և օգնի, որ հասկանաս, թե ինչ է սովորեցնում Աստվածաշունչը։