TJI MO lese okorande, tji mo tara otivii poo tji mo puratene koradio, u muna nokuzuva ohunga nozondjito zoutwe, ovita nomazepasaneno. Ove omuini mape ya u kondja nomauzeu tjimuna omutjise poo wa zepaisa umwe wovasuverwa voye.

Ripura omuini kutja:

• Indji ondja ri ondando yaMukuru ku ami neṱunḓu randje?

• Ombatero yokutjinda omauzeu wandje me i munu pi?

• Hapo maaku kakara ohange yatjiri kombanda yehi?

Ombeibela i yandja omaziriro omakovise komapuriro ngo.

• Ovandu kamaave kavera, okukurupa poo okukoka rukwao.—Omavandururiro 21:4

• “Nomuremane ma tuka peyuru otja omenye.”—Jesaja 35:6

• “Indino omupoṱu ma munu.”—Jesaja 35:5

•  Ovaṱi avehe mave kotorwa komuinyo.—Johanes 5:28, 29

• Kape nomundu ngu ma kavera rukwao.—Jesaja 33:24

• Ovandu avehe kombanda yehi mave kakara novikurya mbya yenene.—Epsalme 72:16

Oupupu okumuna kutja oviṋa avihe mbya tamuna pomikuma omitenga vyembo ndi oturoto uriri. Posi yokutja Mukuru wa kwizika kutja ma yenenisa oviṋa mbi kombanda yehi moruyaveze rwatjimanga, nu Ombeibela i kahurura kutja eye me vi yenenisa vi.

Ombeibela wina i tu kahururira ovingi kombanda yanao. Oyo i tu raera ohunga nomiano vyokukara nondjoroka yatjiri nai. Ripura ohunga nozombameno nomauzeu woye omuini. Ove ngahino u nouzeu wotjimariva, ouzeu meṱunḓu, ouvere poo ngahino wa zepaisa umwe wovasuverwa voye. Ombeibela mai ku vatere okutjinda omauzeu ndino, nu wina mai yenene okukuvatera okuzira omapuriro otja inga:

• Omena ratjike tji tu muna ouzeu?

• Matu yenene vi okutjinda omauzeu wetu?

• Matu yenene vi okukara nouṋingandu meṱunḓu?

• Tji twa koka tu yenda pi?

• Ovasuverwa vetu mba ṱa, mape ya atu kevemuna rukwao?

• Ongwaye tji tu nongamburiro kutja Mukuru ma yenenisa oviṋa avihe mbya kwizika?

 Mokulesa embo ndi, ove mo raisa kutja mo vanga okutjiwa imbi Ombeibela mbi i honga. Embo ndi mari ku vatere okutjiwa kutja Ombeibela i honga tjike. Pe nomapuriro ngu maye hitasana nozoparagrafa nu ngu maye ku vatere okuzuva Ombeibela nawa. Ovandu omangete omengi va kara nondjoroka okurihonga Ombeibela puna Ovahongonone vaJehova. Eṱe matu zeri kutja ove wina mo kara nondjoroka otjingeyo. Mukuru nge ku sere ondaya otja tji mo konḓonona kutja Ombeibela mai yenene okukuhonga tjike!