ARI surat kabar, TV, radio, tauka Internet, nuan meda sereta ninga mayuh cherita pasal jenayah, perang, enggau pengawa ngelaban perintah. Nuan empu engka merinsa ketegal penyakit tauka ketegal orang ti dikesayauka nuan udah mati.

Tanya diri empu:

• Kati tu utai ti dikedekaka Petara ba aku enggau kami sebilik?

• Dini alai aku tau bulih bantu kena mutarka penusah diri?

• Kati pemaik ti bendar deka bisi?

Bup Kudus meri saut ti ngemuaska ati ngagai tanya tu.

• Orang enda agi ngasaika pemedis, mansang tuai, tauka mati.—Pemandang 21:4

• “Orang ke enda ulih bejalai, deka merejuk.”—Isaiah 35:6

• “Orang ke buta ulih meda.”—Isaiah 35:5

•  Orang ke udah mati deka diidupka baru.—John 5:28, 29

• Orang enda agi sakit.—Isaiah 33:24

• Semua orang ba dunya deka chukup pemakai.—Masmur 72:16

Nuan engka ngumbai utai ti udah dibacha nuan ba lambar 4 enggau 5 dalam bup tu semina mimpi aja. Tang Petara udah besemaya deka ngaga ubah nya ba dunya enda lama da agi, lalu Bup Kudus nerangka baka ni Iya deka ngereja nya.

Bup Kudus madah mayuh agi pasal utai bukai. Iya madahka utai ti patut ditemu kitai ngambika tau bulih pengidup ti lantang sereta ngerinduka ati diatu. Uji pikirka enda lama pasal utai ti ngasuh nuan irau. Nya engka nyengkaum duit, tauka penanggul ba diri sebilik, enda bepengerai, tauka mati orang ti dikesayauka nuan. Bup Kudus ulih mantu nuan mutarka penusah nya, sereta ngelantangka ati nuan enggau meri saut ngagai tanya tu:

• Nama kebuah kitai merinsa?

• Baka ni kitai ulih mutarka penusah kitai?

• Ulih ruang bilik kitai lantang?

• Nama nyadi pengudah kitai mati?

• Ulih kitai betemu baru enggau orang ti dikesayau ke udah mati?

• Nama kebuah kitai tau andal Petara deka ngereja semua utai ke udah disemaya Iya?

 Nuan macha bup tu laban nuan deka nemu utai ti diajar dalam Bup Kudus. Bup tu deka nulung nuan. Tiap iti genteran bisi tanya ke deka nulung nuan meretika Bup Kudus enggau manah agi. Bejuta iku orang rindu berandauka Bup Kudus enggau Saksi-Saksi Jehovah. Kami mega ngarapka nuan baka nya. Arapka nuan bulih berekat ari Petara lebuh nuan nemu utai ti diajar Bup Kudus ngagai nuan!