KADA mabbibbig ka tu diariu, maggiraw tu TV, onu magginna ta radio, masingan anna maginnam i napakaru nga balita na krimen, gerra, anna terorismo. Baka mazziga-riga ka gapa megafu ta taki onu megafu ta natayakka.

Iyavu ta baggim:

• Yaw kari i kayà na Dios nga mesimmu niakan anna ta familià?

• Pakalegakku tu uffun tapenu masolba i problemà ira?

• Egga kari noka i kurug nga imammo?

Mangiyawa i Biblia tu makakumbinsi ira nga tabbag tatun ira nga pakkiavu.

• Ari ngana noka nga maraddam, mallakay onu mabbako, onu matay i tolay.​—Nepakannammu 21:4

• “Mallattu noka i pilay ira nga kagitta na utta.”​—Isaias 35:6

• “Makasingan noka i vuling ira.”​—Isaias 35:5

•  Maginnolay noka i natay ira.​—Juan 5:28, 29

• Awan ngana noka tu mattaki.​—Isaias 33:24

• Abundansia noka i makan para ta ngamin nga egga ta davvun.​—Salmo 72:16

Baka nonopammu nga ilusion laman i nabibbig mu ta ollu ira nga pahina naw nga libru. Ngem nipromesa na Dios nga arannina ngana nga kuan danatun nga panguloli ta davvun, anna iyesplika na Biblia nu kunnasina kuan yatun ira.

Ari laman tu yatun i ituddu na Biblia. Kagianna paga i mawag nga kuattam tapenu kurug nga magayayya anna talaga magenjoy ta pattolay sangawe. Nonopammu i pakavurungammu ira. Baka mapproblema ka ta kuartu onu familia, mataki ka, onu natayakka. Moffunan naka na Biblia tapenu arubangan danaw nga problema, anna banna-bannayan naka gukaban na pattabbag taw ira nga pakkiavu:

• Ngatta mazziga-riga ittam?

• Kunnasi tam solban i problema ira?

• Kunnasi mabbalin tu magayayya i familia tam?

• Anni i mesimmu nittam nu matay ittam?

• Masingattam kari paga noka i natay ira nga iddeddukattam?

• Ngatta makapakkomfiansa ittam nga kuan na Dios i ngamin nga nipromesana?

 Ipasingan na pabbibbig mu taw nga libru nga kayà mu nga mammuan i ituttuddu na Biblia. Moffunan naka naw nga libru. Egga ira i pakkiavu na kada parapo, nga makoffun nikaw nga mas malippawa i Biblia. Minillion i magaya-ayayya nga makipaggigiammu tu Biblia ta Saksi ira ni Jehova. Kunnatukka nakuan gapa. Bendisionan naka nakuan na Dios durante nga ammuammu nu anni i ituddu na Biblia nikaw!