RADIO madat ai, shi laika hti ai, TV yu ai shaloi tara tawt lai ai lam ni, majan ni hte n hkru n hkra ai lam ni grai law hkra mu lu, na lu ai. Nang hkrum nga ai yakhkak jamjau ai lam ni hpe myit yu u. Nang machyi ai shing nrai nang tsawra ai marai langai ngai si mat ai majaw grai yawn ai lam ni byin chye ai.

Tinang hkum tinang ndai hku san yu u:

• Ngai hte nye a nta masha ni a matu Karai Kasang a yaw shada lam gaw dai hku sha rai kun?

• Nye a manghkang ni hpe hparan na matu gara kaw na karum shingtau lam lu na kun?

• Teng man ai simsa lam lu na hpe myit mada mai ai kun?

Dai ga san ni hte seng nna myit shadik ya lu ai mahtai hpe Chyum Laika hta mu lu ai.

• Shinggyim masha ni hta machyi ai, asak kung ai, si ai lam ni nga sana n re.—Shingran 21:4

• ‘Lagaw hten ai wa gaw shan nga zawn gumtawng lu na.’—Esaia 35:6

• ‘Myi hten ai ni myi mu lu na.’​—Esaia 35:5

• Si mat ai ni bai hkrung rawt wa na.​—Yawhan 5:28, 29

• Kadai mung machyi sana n re.​—Esaia 33:24

• Mungkan ntsa nga ai masha yawng hta lu sha law htam wa na re.​—Shakawn 72:16

Shawng na laika man ni hpe nang hti yu ai shaloi, dai lam ni gaw yup mang zawn sha re nga nna aloi sha sawn la hkrup chye ai. Raitim, kade n na yang mungkan ntsa hta dai hku galaw ya na nga nna, Karai Kasang ga sadi jaw da ai. Shi gara hku galaw ya na lam hpe mung Chyum Laika hta tsun da ai.

Dai hta n-ga, ya aten hta ngwi pyaw simsa ai asak aprat lu na matu, chye ra ai lam ni hpe mung Chyum Laika hta tsun da ai. Nang hpe myit tsang shangun ai lam ni hpe chyahkring mi myit yu u. Dai hta, ja gumhpraw a majaw byin ai manghkang ni, kun dinghku manghkang ni, hkam n kaja ai lam ni hte nang tsawra ai marai langai ngai si mat ai lam ni lawm na re. Dai manghkang ni hparan lu na matu Chyum Laika gaw karum ya lu ai. Lawu na ga san ni a Chyum Laika mahtai ni gaw nang hpe shalan shabran ya lu ai:

• Anhte hpa majaw yakhkak jamjau hkrum nga ai kun?

• Anhte a manghkang ni hpe gara hku hparan lu na kun?

• Anhte a kun dinghku ngwi pyaw lu na kun?

• Anhte si mat ai shaloi hpa byin mat ai kun?

• Si mat ai anhte a tsawra ai ni hte bai hkrum lu na kun?

• Karai Kasang gaw shi jaw da ai ga sadi ni hte maren hpring tsup hkra galaw ya na hpe anhte hpa majaw kam mai ai kun?

 Nang ndai laika buk hpe hti ai majaw Chyum Laika hpa sharin ya ai hpe nang chye mayu ai lam madun ai. Ndai laika buk gaw nang hpe karum ya na re. Laika pang ni a matu san da ai ga san ni gaw Chyum Laika grau chye na wa hkra nang hpe karum ya na re. Masha wan law law gaw Yehowa Sakse Ni hte rau, Chyum Laika hti ai hpe grai ra sharawng ma ai. Nang mung dai hku ra sharawng na hpe myit mada ga ai. Nang ndai hku Chyum Laika hkaja ai hpe Karai Kasang shaman chyeju jaw u ga law.