RĨRĨA wathoma ngathĩti, ũkerorera TV, kana ũgathikĩrĩria redio, nĩ wonaga kana ũkaigua ũhoro mũingĩ wĩgiĩ wĩki-naĩ, mbaara, na tharĩkĩro cia itoi. No gũkorũo o nawe nĩ ũrathĩnio nĩ mũrimũ kana rĩngĩ ũrĩ na kĩeha nĩ ũndũ wa gũkuĩrũo nĩ mũndũ wendete.

Ta wĩyũrie ũũ:

• Hihi ũũ nĩguo Ngai endaga mũtũũrĩre wakwa na wa famĩlĩ yakwa ũkorũo ũtariĩ?

• Ingĩruta kũ ũteithio wa kũhiũrania na mathĩna makwa?

• Hihi nĩ kũrĩ hĩndĩ gũgaakorũo na thayũ wa ma?

Bibilia nĩ ĩheanaga macokio ma kwĩhokeka ma ciũria icio.

• Andũ matigaacoka gũkorũo na ruo rĩngĩ, gũkũra, o na kana gũkua.—Kũguũrĩrio 21:4

• “Mũndũ ũrĩa ũthuaga akaarũgarũga o ta thwariga.” —Isaia 35:6

• “Maitho ma atumumu nĩ makaahingũrũo.” —Isaia 35:5

•  Andũ arĩa makuĩte nĩ makaariũkio. —Johana 5:28, 29

• Gũtirĩ mũndũ ũkaarwaraga. —Isaia 33:24

• O mũndũ agaakoragwo na irio cia kũigana. —Thaburi 72:16

Rĩngĩ no ũhiũhe gwĩciria atĩ maũndũ marĩa wathoma kĩambĩrĩria-inĩ kĩa ibuku rĩrĩ no iroto tu. No Ngai nĩ eranĩire atĩ ica ikuhĩ nĩ egwĩka mogarũrũku macio thĩinĩ wa thĩ, na Bibilia nĩ ĩtaaragĩria ũrĩa egwĩka ũguo.

Bibilia nĩ ĩtũheaga ũhoro makĩria. Nĩ ĩtwĩraga maũndũ marĩa tũrabatara kũmenya nĩguo tũgĩe na gĩkeno kĩa ma na tũkenere ũtũũro mahinda-inĩ maya. Ta wĩcirie ũhoro wa maũndũ marĩa matũmaga ũtangĩke. No gũkorũo nĩ mathĩna ma mbeca, famĩlĩ, mũrimũ, kana gũkuĩrũo nĩ mũndũ wendete. Bibilia no ĩgũteithie kũhiũrania na mathĩna macio, na no ĩkũũmĩrĩrie kũgerera macokio ma ciũria ta ici:

• Mathĩna matũkoraga nĩkĩ?

• Tũngĩhota atĩa kũhiũrania na mathĩna maitũ?

• Hihi famĩlĩ itũ no ĩkorũo na gĩkeno?

• Gũthiaga atĩa harĩ mũndũ rĩrĩa akua?

• Hihi andũ aitũ arĩa makuĩte nĩ tũkaamona rĩngĩ?

• Nĩ kĩĩ kĩngĩtũma tũkorũo na ma biũ atĩ Ngai nĩ akaahingia maũndũ mothe marĩa eranĩire?

 Gwĩtĩkĩra gũthoma ibuku rĩrĩ kũronania atĩ nĩ ũrenda kũmenya maũndũ marĩa Bibilia ĩrutanaga, na nĩ rĩgũgũteithia gwĩka ũguo. Ibungo irĩ na ciũria cia gũgũteithia gũtaũkĩrũo nĩ Bibilia wega. Andũ milioni nyingĩ nĩ makeneire kwarĩrĩria Bibilia hamwe na Aira a Jehova. Tũrerĩgĩrĩra o nawe nĩ ũgũkenera. Ngai arokũrathima ũgĩthiĩ na mbere kũmenya maũndũ marĩa Bibilia ĩgũkũruta!