ПӰӰН газета хығырчатсабыс, телевизор кӧрчетсебіс алай радио исчетсебіс, хомай хабарларға кӧп учурапчабыс. Чир ӱстӱне сайбағлар, чаалар паза терроризм тол парған! Ағаа хоза, полған на кізінің позының сидіктері пар. Кем-де тың ағырча, кемнің-де чағыны ӱреп парған.

Сағын кӧріңер:

• Мин алай минің сӧбірем иреелензін тіп, Худай хынча ба?

• Позымның сидіктерімні хайди тобырып аларға?

• Хаҷан полза чир ӱстӱнде амыр чуртас полар ба?

Пу сурығларға нандырығлар Библияда пар.

• Кізілер хаҷан даа ағырбастар, кирібестер паза ӱребестер (Азых чоох 21:4)

• «Ахсах кізі, киик чіли, сегірер» (Исаия 35:6)

• «Харахтары пӱлес кізілернің харахтары чарых пол парарлар» (Исаия 35:5)

•  Ӱреен кізілер хатап чуртирлар (Иоанн 5:28, 29)

• Пірдеезі ағырбас (Исаия 33:24)

• Прайзының чиис кӧп полар (Псалом 72:16)

Алнында чоохталған нимелер хаҷан даа толбас тіп сағынарға маңзырабаңар. Прай пу нимелер Худайның молҷағлары нооза. Оларны Худай хайди толдырарынаңар Библияда чарыда чоохталча.

Ағаа хоза, Библия сірерге амох часкалығ чуртирға полыс полар. Арса, сірерге ахча чидіспинче алай сӧбіреде сидіктер полча, хазығыңар уйан полча алай чағын кізіңер ӱреп парған. Прай пу нимелер кізіні пичеллендірчелер. Библия сірерге прай пу сидіктерні тобырарға полыс пирер. Ідӧк Библия сірерні, алтында пирілген сурығларға нандырып, часхарар:

• Ноға чир ӱстӱнде чабал киректер паза иреелер анҷа кӧп?

• Сидіктерні хайди тобырып аларға?

• Сӧбіредегі часка нименең палғалыстығ?

• Ӱреен соонда кізінең ниме полча?

• Ӱреен чағыннарыбысха хаҷан-да хатап тоғазарбыс па?

• Пирген молҷағларын Худай толдыр саларында ноға ікінҷілебеске чарир?

 Пу киндені хығырчатханыңар Библия нимее ӱгретчеткенін піліп аларға хынчатханыңарны кӧзітче. Пу кинде анзында сірерге полыс пирер. Пу киндені абзацтарға пирілген сурығлар хоостыра ӱзӱрзер, Библияны чахсы арах піліп аларзар. Миллионнар Иегованың киречілерінең хада Библияны сурығлар хоостыра хынып ӱгренгеннер. Сірерге дее хынығ полар тіп сағынчабыс. Библия нимее ӱгретчеткенін піліп аларға кӱстенчеткеніңерні Худай алғастап пирзін!