UW UBAL bikand-kand, utal televizion eecy umvw myand yidyobw baleeb ku cisanj, baleeleebok teng myand ya cikis, ya mavit ni ya cinyang. Misang yikwaabw ukekeeng bwaal ubebeel eecy bwaal udy mufwiish muut uwudy mukat.

Langil a majooj aam:

• Mawej ukacil naak bwa mim ni biin mu cisak cya mim eeny?

• I kweeh kunady mwa kuhetel dyambulwiish bwa kuhit bilengel ni makab?

• Kwiiyiiy kwiikalok diifuk dikwaabw ditalal ha bulab eeny?

Bibl utwaatwaal malabul matwiishibw ku majooj aam.

• Baat kabakubeeloh bend, kabakununahoh bend, ning kabakufwoh bend.​—Myand Yisokolweel Jah 21:4

• “Balemen biiyiiy kutuhik bu ngulung.”​—Yeshaay 35:6

• “Mees ma bafw mees miiyiiy kutal.”​—Yeshaay 35:5

•  Bafw biiyiiy kusanguk.​—Jah 5:28, 29

• Muut ning waakaabumw kakuleeboh bend neey na beebeel.​—Yeshaay 33:24

• Baat biiyiiy kwiikal ni byakudy bivul.​—Misambw 72:16

Udy mwa kulang neey malay mady mu mabij ma ku butambwiil bwa mukand oow i bilot bituh. Ki Mawej ulalay bwa kwiiy kwiimakumbaj mu mafuk makeeh oomw. Bibl uvumvwiij mwiikal Mawej mwa kwiimakumbaj.

Mu Bibl mudy myand yikwaabw yivul. Wiituleeleej mushind a kwiikal ni musangal teng kaabaak. Lang bwa mal mawumoomon kaabaak oow. Kukakal kwa fwaalang, makab ma mu cisak, cikwaabw udy mwa kwiikal mufwiish muut uwudy mukat. Bibl udy mwa kukwambulwiish bwa kuhit bilengel ni makab aam. Ukukakashish ku micim bwaal utwaatwaal malabul ku majooj aam:

• Bwabiny kudy makeng mavul?

• I mushind kaay utudy mwa kuhit bilengel ni makab miitut?

• Cisak ciitut cidy mwa kwiikal ni musangal bicy?

• I biny bitufifikil hatufwaafw?

• Twiiyiiy kutalanganok ni baat batudy bakat bakaady bafw eeny?

• Bwabiny tudy mwa kwiitab malay moos mady Mawej mulay?

 Hawubabal mukand oow, udy mukat kumanyik cidy Bibl ulongweesh. Mukand oow wiiyiiy kukwambulwiish. Kudy majooj mu cikos cyoos miiyiiy kukwambulwiish bwa kumvw bilengel myand yileeleeb Bibl. Baat miliyo yivul i bakat kwiisamb ni batemw ba Yehow myand yileeleeb Bibl. Tudy batakamin neey biiyiiy kukusangeej byeeb. Tuloolomb bwa Mawej hakufiil kis mu kwiikashishomw kwiibuh bwa kumanyik myand yiloolongweesh Bibl!