UMVWE mwatanga pepala wa byambo nangwa mwateleka ku televizhonyi nangwa ku waileshi kujitu mashimikila abena kwamba pa bumbanzhi, nkondo, ne malwañano. Kampe mubena kumanama na kikola nangwa lufu lwa mutemwe wenu lwimulengela kwikala na binyenge.

Ishikishai anwe bene amba:

• Nanchi Lesa ukeba’mba amiwa ne kisemi kyami twikalenga bibye nyi?

• Ñanyi wakonsha kunkwasha kuyuka bya kuba na makatazho?

• Nanchi tukekalapo mutende nyi?

Mu Baibolo mo muji mikumbu ya ano mepuzho.

• Bantu kechi bakakotanga, kufwa nangwa kumanama na bikola ne.—Lumwekesho 21:4

• “Bantu balemana bakakilauka nobe balupaala.” —Isaya 35:6

• “Meso a bampofu akalaba.” —Isaya 35:5

•  Bafwa bakekala jikwabo na bumi.—Yoano 5:28, 29

• Kafwako ukakolwanga ne.—Isaya 33:24

• Bantu bonse bakekala na kajo kavula pano pa ntanda ponse.—Salamo 72:16

Mwakonsha kulanguluka’mba byo mwatanga ku ntendekelo ya uno buku mashimikilatu kechi bikekalako ne. Bino Lesa walaya’mba katatakatu akafumyepo bintu byatama pano pa ntanda, kabiji Baibolo walumbulula byo akoba bino.

Kuji ne bintu bikwabo Baibolo byo yaambapo. Bitulengela kuyuka bya kwikala na lusekelo lonka luno. Akilangulukai pa makatazho o mubena kupitamo. Nabiji kubula mali, makatazho a mu kisemi, kukolwa, nangwa lufu lwa muntu ye twatemwa. Baibolo wakonsha kwimukwasha kuyuka bya kuba na ano makatazho. Kabiji byaamba Baibolo pa ano mepuzho bikemutekenesha bingi:

• Mambo ka o tuyanjila?

• Ki ka kyakonsha kwitukwasha kuyuka bya kuba na makatazho a mu bwikalo?

• Twakonsha kwikala byepi na lusekelo mu kisemi?

• Ki ka kimweka inge muntu wafwa?

• Nanchi bafwa bakekala na bumi jikwabo nyi?

• Twayuka byepi kuba’mba Lesa ukafikizha byonse byo alaya?

 Byo mubena kutanga uno buku kibena kumweshatu patoka’mba mukeba kuyuka byaamba Baibolo. Uno buku usakwimukwasha bingi. Mafuka aji na mepuzho kunshi asakwimukwasha kumvwisha byaamba Baibolo. Bantu bavula bamwenamo bingi mu kwisamba pa byaamba Baibolo na Bakamonyi ba kwa Yehoba. Twaketekela ne anweba Baibolo usakwimukwasha bingi. Lesa emupeshe pa kuba’mba mumvwishe byaamba Baibolo!