TE A nua pɛ o yau lakonaa niŋ, ma nua tɛlivisiɔŋndo, ɔɔ ma yaŋ alaadioo nilaŋ, ma che nduyɛ ma tuei konalaŋ a sawa tɛɛmbaa okɔɔ, chɔulaŋ, a delɔɔ choo. Naapum num bɛɛ cho saŋgaa a dialii nɛyɛi ɔɔ le piɔm wana ŋ kaala wo.

Nyunaŋndɔ aa:

• Baa hei Mɛlɛka yeema le ya a yuŋgu nuu ni?

• Kuɛɛnɛ ya sɔla yɛ malaa le bahawɛila nilaŋ biuwɔŋndo?

• Baa kɔl nyulu kpeekpeiyo wa niŋ pa?

Baabuiyo ke naa mulila kpeekpei laŋ le nyunalaŋ ndaŋ.

• Nyɛ nɛiyaa ve lɛ niŋ waŋchieeya choo le, kɛlɛŋgaa ma yuwa, ɔɔ ma vi.​—Sɔɔŋ Chɔɔmaŋndoŋ 21:​4

• “Wanaa bɛvɛiya cho chɔnɔŋ o peluŋ ndaaŋ choo ma huulu, ma ye.”​—Aisaya 35:​6

• “Wanaa cho a sumɛiya a cho hunɔɔ chɔ.”—Aisaya 35:​5

•  Wanaa vi wa cho hunɔɔ miiŋgu yoomu.—Chɔŋ 5:​28, 29, NW

• Wana o wana nee lɛ niŋ te.—Aisaya 33:​24

• Nyɛdiaa cho wa tau le wana o wana cho wa o chieeŋndo choo.—Sam 72:​16

I wa tɛtɛlɛ le ma yiyaŋ maa nyɛ ŋ laŋga nua o pei amakɔɔ o yauwo hoo niŋndo, lɔma sɔlaŋ ko o cho ni. Kɛ Mɛlɛka mɛi lediom le mbo hiŋ a siŋgaŋnda laŋ suŋ suŋ, nduyɛ Baabuiyo tɛɛsiaa mɛɛ o cho ndi tosa yɛ.

O cho ko keŋ te Baabuiyo chɔm naa le. O chɔm naa vɛlɛ nyɛ naŋ nɔ miŋ tosa le miŋ sɔla nyaale kpeekpeiyo nduyɛ miŋ tuei yoomoo yeela suŋ suŋ ndo. Yiyaŋndɔ a sɔɔŋ tosa ma buulaŋ ndoŋ. Ŋpum cho ni, nyɛsɔlaa lepɛŋndo, bahawɛila yuŋgoo, kɛndiaa lepɛŋndo, ɔɔ piɔm wana ŋ kaala wo. Baabuiyo mala num le bahawɛilaŋ ndaŋ biuwɔŋndo. Nduyɛ, o dɛɛniaa num kɔllo a nyunala o muli laŋ ndaŋ:

• Le yɛɛ nyɛpalaa cho yɛ naa choo?

• Vɛɛ naŋ biunuŋ yɛ bahawɛila naalaŋ?

• Baa yuŋgu naa nɔla pa mbo wa a nyaale?

• Yɛɛ yɔŋnuŋ yɛ naa te ŋ vi pɛ?

• Ŋ cha lɛ niŋ pa wanaa naa kaalaa vi wa?

• Le yɛɛ naŋ nɔ yɛ tiindaŋndo maa Mɛlɛka cho tosa nyɛ o nyɛ o mɛi lediom?

 Nua ŋ cho o yauwo hoo niŋndo chɔm ni maa, a yeema ma sina nyɛ Baabuiyo pɛɛku wo. Yauwo hoo cho num mala. Nyunalaŋ la cho le pɛltaŋ. La cho num mala ma bii Baabuiyo bila nyɛkɛndɛi. Waŋnda o miiliɔŋndaŋ niŋ tuei niŋ Baabuiyo pɛɛkoo yeela a Seiyaa Chɛhowaa. Ŋ laalaŋ maa num bɛɛ cho ndu tueiyɔɔ yeela. Maa Mɛlɛka dɔu num sala fɔ te a wa pɛ yaasiaa nyɛ Baabuiyo pɛɛku numndo!