န​ဖး လံာ်​တၢ်ကစီၣ်​မ့ၢ်ဂ့ၤ, ကွၢ်​တၢ်ဂီၤမူ​မ့ၢ်ဂ့ၤ, ဒိကနၣ်​ကလံၤ​ဒၢ​မ့ၢ်ဂ့ၤ န​က​ထံၣ်ဘၣ်​ တၢ်အၢ​တၢ်သီ, တၢ်ဒုး​တၢ်ယၤ ဒီး​တၢ်မၤ​ဆူၣ်​မၤစိး​တဖၣ်​ အိၣ်ဝဲ​အါမး​လီၤ. ဘၣ်​သ့ၣ်​သ့ၣ်​ န​က​တူၢ်ဘၣ်​ခီၣ်​ဘၣ်​တၢ် ခီဖျိ​လၢ​န​အိၣ်ဒီး​တၢ်ဆူး​တၢ်ဆါ မ့တမ့ၢ် ပှၤလၢ​န​အဲၣ်ဘၣ်​အီၤ​တဂၤ​သံဝဲ​အဃိ​န့ၣ်​လီၤ.

သံကွၢ်လီၤ​န​သး​လၢ

• မ့ၢ်​ကစၢ်​ယွၤ​ဘၣ်​အသး​လၢ ယၤ​ဒီး ယ​ဟံၣ်ဖိ​ဃီဖိ က​တူၢ်ဘၣ်​တၢ်​ဒ်အံၤ​ဧါ

• ဒ်သိး​ယ​လဲၤခီဖျိ ယ​တၢ်ကီ​တၢ်ခဲ​တဖၣ်​က​န့ၢ် အဂီၢ် ယ​ဃု​တၢ်မၤစၢၤ​က​သ့​ဖဲလဲၣ်

• ခါဆူညါ​န့ၣ်​ တၢ်မုာ်​တၢ်ခုၣ်​နီၢ်နီၢ် ကအိၣ်​ထီၣ်​ တဘျီဘျီ​ဧါ

လံာ်စီဆှံ​ပာ်ဖျါ​ထီၣ်ဝဲ တၢ်​စံးဆၢ​လၢ တၢ်​သံကွၢ်​တဖၣ်​အံၤ​အဂီၢ်​လီၤ.

• ပှၤ​ဟီၣ်ခိၣ်​ဖိ​တဖၣ်​ တ​ကွၢ်ဆၢၣ်မဲာ်​ဘၣ်​ တၢ်သံတၢ်ပှၢ် ဒီး​တၢ်သူၣ်အုး​သးအုး​လၢၤဘၣ်.—လီၣ်ဖျါ ၂၁:၄

• “ပှၤ​အ​ခီၣ်​ဟးဂီၤ က​စံၣ်ထီၣ် ဒ်​တၤဟိ​အသိး” လီၤ.—ယၡါယၤ ၃၅:၆

• “ပှၤမဲာ်ဘျီၣ်​ အမဲာ်​က​အိးထီၣ်”လီၤ.—ယၡါယၤ ၃၅:၅

•  ပှၤသံ​တဖၣ်​ က​ဂဲၤဆၢထၢၣ်​သမူထီၣ်​က့ၤဝဲ​လီၤ.—ယိၤဟၣ် ၅:၂၈, ၂၉

• ပှၤ​တ​ဆူး​တ​ဆါ နီ​တဂၤ​လၢၤဘၣ်.—ယၡါယၤ ၃၃:၂၄

• ပှၤ​အိၣ်​လၢ ဟီၣ်ခိၣ်​ချၢ​ကိးဂၤ​ဒဲး ကအိၣ်​ဒီး​တၢ်အီၣ်​တၢ်အီ​လၢ​လၢပှဲၤပှဲၤ​န့ၣ်​လီၤ.—စံးထီၣ်​ပတြၢၤ ၇၂:၁၆

ဖဲ​န​ဖးဘၣ် လံာ်​ကဘျံးပၤ အဆိ​ကတၢၢ်​တဖၣ်​လၢ လံာ်​တဘ့ၣ်​အံၤ​အ​ပူၤ​န့ၣ်​ ဘၣ်​သ့ၣ်​သ့ၣ်​ န​က​ဆိကမိၣ်​ဘၣ်​လၢ တၢ်ဂ့ၢ်​တဖၣ်​အံၤ က​မ့ၢ်ဒၣ်​တၢ်မံမီၢ်​တခါ​လၢ​ယ​ဂီၢ်​လီၤ. ဘၣ်ဆၣ်​ တ​ယံာ်လၢၤဘၣ်​န့ၣ်​ ကစၢ်​ယွၤ​က​မၤ​လၢထီၣ်​ပှဲၤထီၣ်​ အ​တၢ်​အၢၣ်လီၤ​အီလီၤ​တဖၣ်​လၢ ပှၤ​ဟီၣ်ခိၣ်​ဖိ​အဂီၢ်​န့ၣ်​လီၤ. ဒီး​ကစၢ်​ယွၤ​က​မၤဝဲ​လၢ​ကျဲ​ဒ်လဲၣ်​န့ၣ်​ လံာ်စီဆှံ​ပာ်ဖျါ​ထီၣ်ဝဲ​လီၤ.

တကးဒံးဘၣ်​ ဒ်သိး​ပ​ကအိၣ်​ဒီး​တၢ်သးခု ဒီး​တၢ်​သူၣ်မံ​သးမုာ်​နီၢ်နီၢ်​အဂီၢ် လံာ်စီဆှံ​ပာ်ဖျါ​ထီၣ်​န့ၢ်​ပှၤ​တၢ်​လၢ ပ​က​ဘၣ်​သ့ၣ်ညါ​အီၤ​တဖၣ်​လီၤ. ဆိကမိၣ်​ကွၢ် ဘၣ်ဃး​ဒီး​တၢ်​လၢ​အ​ဒုး​သူၣ်ကိၢ်​သးဂီၤ​နၤ​န့ၣ်​တက့ၢ်. အဒိ တၢ်​လၢ​ပ​သူၣ်ကိၢ်​သးဂီၤ​တဖၣ်​န့ၣ်​ ပၣ်ဃုာ်ဒီး ကျိၣ်စ့​တၢ်ကီ​တၢ်ခဲ, ဟံၣ်ဖိ​ဃီဖိ​တၢ်​သဘံၣ်​သဘုၣ်​တဖၣ်, တၢ်​အိၣ်ဆူၣ်​အိၣ်ချ့, မ့တမ့ၢ် ဖဲ​ပှၤလၢ​ပ​အဲၣ်ဘၣ်​အီၤ​တဂၤ သံဝဲ​အဆၢ​ကတီၢ်​န့ၣ်​လီၤ. လံာ်စီဆှံ​မၤစၢၤ​နၤ ဒ်သိး​န​လဲၤခီဖျိ​တၢ်ကီ​တၢ်ခဲ​တဖၣ်​အံၤ က​န့ၢ်ဝဲ​အဂီၢ်​လီၤ. ဒီး​လံာ်စီဆှံ မၤမုာ်​ထီၣ်​က့ၤ​န​သး​သ့​ခီဖျိ​လၢ အ​ပာ်ဖျါ​ထီၣ်ဝဲ​တၢ်​သံကွၢ်​လၢ လာ်​တဖၣ်​အံၤ​အ​တၢ်​စံးဆၢ​အဃိ​န့ၣ်​လီၤ.

• ဘၣ်​မနုၤ​အဃိ ပ​တူၢ်ဘၣ်​တၢ်နး​တၢ်ဖှီၣ်​လဲၣ်

• ပ​လဲၤခီဖျိ ပ​တၢ်ကီ​တၢ်ခဲ​တဖၣ်​ က​သ့​ဒ်လဲၣ်

• ပ​ဟံၣ်ဖိ​ဃီဖိ အိၣ်ဒီး​တၢ်မုာ်​တၢ်ခုၣ်​က​သ့ဧါ

• ဖဲ​ပှၤ​တဂၤ​သံဝဲ​အဆၢ​ကတီၢ် တၢ်မၤ​အသး​ဒီး​အီၤ​ဒ်လဲၣ်

• ပှၤလၢ​ပ​အဲၣ်ဘၣ်​အီၤ​လၢ​အ​သံ​တ့ၢ်​န့ၣ်​ မ့ၢ်​ပ​က​ထံၣ်ဘၣ်​က့ၤ​အဝဲသ့ၣ်​ဒံး​ဧါ

• ဘၣ်​မနုၤ​အဃိ​ပ​နာ်​သ့​လၢ ကစၢ်​ယွၤ​က​မၤ​လၢထီၣ်​ပှဲၤထီၣ်​ အ​တၢ်​အၢၣ်လီၤ​အီလီၤ​တဖၣ်​လဲၣ်

 ခီဖျိ​လၢ န​ဖးလံာ်​တဘ့ၣ်​အံၤ​အဃိ ဖျါ​လၢ​န​အဲၣ်ဒိး​သ့ၣ်ညါ​တၢ်​လၢ လံာ်စီဆှံ​သိၣ်လိ​ဝဲ​တဖၣ်​န့ၣ်​လီၤ. ဒ်သိး​န​မၤ​ဒ်​န့ၣ်​က​သ့​အဂီၢ်​န့ၣ်​ လံာ်​တဘ့ၣ်​အံၤ​က​မၤစၢၤ​နၤ​လီၤ. တၢ်​သံကွၢ်​လၢ အ​ဘၣ်ထွဲ​လိာ်သး​ဒီး​လံာ်​အဆၢ​တဖၣ်​န့ၣ်​ က​ကဲထီၣ်​တၢ်မၤစၢၤ​လၢ န​က​နၢ်ပၢၢ်​အါထီၣ်​ လံာ်စီဆှံ​အဂီၢ်​န့ၣ်​လီၤ. ပှၤလၢ​အ​ကကွဲၢ်​တဖၣ်​ ဒိးန့ၢ်​ဘၣ်​တၢ်သးခု ခီဖျိ​လၢ​အဝဲသ့ၣ်​ မၤလိ​လံာ်စီဆှံ​ဒီး ယဟိဝၤ​ပှၤအုၣ်​အသး​တဖၣ်​အဃိ​လီၤ. ပ​ဆၢ​မုၢ်လၢ်​လၢ န​က​မၤလိ​လံာ်စီဆှံ ဒီး​ယဟိဝၤ​ပှၤအုၣ်​အသး​တဖၣ်​စ့ၢ်ကီး​လီၤ. ဖဲ​န​ဃု​သ့ၣ်ညါ​အါထီၣ်​ လံာ်စီဆှံ​အ​တၢ်​သိၣ်လိ​တဖၣ်​ အဆၢ​ကတီၢ်​န့ၣ်​ မ်​ကစၢ်​ယွၤ​ဆိ​ဂ့ၤ​နၤ​တက့ၢ်.