NTANGU nge kena kutanga zulunalu, kutala televizio, to kulanda bansangu na radio, nge kemona mpe nge kekuwa mambu mingi yina metadila kinkesi, bamvita, mpe kufua bantu. Mbala yankaka nge kena kuniokuama samu nge kena kubela to mpangi to muninga na nge mosi mekufua.

Nge lenda kukiyuvusa:

• Yau nde Nzambi zolaka samu na munu mpe dibuta na munu?

• Wapi kisika munu lenda baka lusadusu samu na kununga bampasi na munu?

• Kilumbu kele beto kevuanda mpenza na kiyenge?

Biblia mepesa bamvutu ya mbote na biuvu yina.

• Bantu kemona diaka mpasi ve, bakenuna diaka ve mpe bakekufua diaka ve.—Kusonga 21:4

• ’Muntu ya dikulu-kifu kepumbua lokola nsesi.’—Yezaya 35:6

• ’Meso ya bantu ya kufua-meso kezibuka.’—Yezaya 35:5

•  Bantu ya kufua kefutumuka.—Yoane 5:28, 29

• Muntu mosi ve kebela diaka.—Yezaya 33:24

• Muntu nionso na ntoto kevuanda na madia mingi—Nkunga 72:16

Nge lenda kanisa ti mambu yina nge metanga na paje ya yiya (4) mpe ya tanu (5) ya mukanda yayi kele kaka ndozi ya mpamba ve. Kasi, Nzambi mepesa nsilulu ti yamebikana fioti yandi kesala mambu yango awa na ntoto, mpe Biblia memonisa mutindu yandi kesala yau.

Biblia mesuka kaka vana ve. Yamezabisa beto mambu yina beto fueti zaba samu na kuvuanda na kiese mpe beto sepela na luzingu banda bubu yayi. Yindula ntete mambu yina ketungisaka nge. Yalenda vuanda kukondua mbongo, bankuamusu ya dibuta, kimbevo to lufua ya muntu yina nge kezolaka. Biblia lenda sadisa nge, nge nunga mambu yango, mpe yalenda kitisa nge ntima na bamvutu ya biuvu yayi:

• Samu na yinki beto kemonaka mpasi?

• Yinki mutindu beto lenda nunga bampasi na beto?

• Dibuta na beto lenda vuanda na kiese?

• Yinki kekuminaka beto kana beto mekufua?

• Kilumbu kele beto kemona diaka bampangi to bankundi na beto yina mekufuaka?

• Samu na yinki beto lenda ndima ti Nzambi kekokisa mambu nionso yina yandi lakaka?

 Lokola nge kena kutanga mukanda yayi, yau nde memonisa ti nge zola kuzaba mambu yina Biblia kelongaka. Mukanda yayi kesadisa nge. Baparagrafi kele na biuvu yina kesadisa nge, nge bakusa Biblia mbote mbote. Bamilio ya bantu kesepelaka kusolula masolo ya Biblia na Bambangi ya Yehova. Beto kele na kivuvu ti nge diaka nge kesepela. Bika Nzambi sakumuna bangolo yina nge kena kusala samu nge bakusa mambu yina Biblia kelongaka!