APA o resa saitunga nokutara kotivi ndi kupurakena koradio, ove kumona nokuzuvha nombudi dononzi kuhamena ukorokotji noyita. Nampo ove kuna kuhepa morwa uvera ndi gumwe gekoro lyoge ga fa.

Lipura asi:

• Karunga yimo ga yi harera asi ni hepe nekoro lyange ndi?

• Kupi nani gwana evatero ni lididimikire maudigu gange?

• Ngapa kara mbili ndi?

Bibeli kugava malimbururo gomawa komapuro ogo.

• Vantu kapi ngava zuvha hena kukora, kapi ngava kurupa ntani kapi ngava fa.—Ehororo 21:4

• “Yirema yomondambo ngayi lidinkura tayi dana.”—Jesaya 35:6

• “Vatwiku ngava vhura kumona ko.”—Jesaya 35:5

•  Vafe ngava kava pindura konomfa.—Johanesa 5:28, 29

• Kwato gumwe nga ka vera.—Jesaya 33:24

• Nkenye gumwe pevhu nga kara nonondya dononzi.—Episarome 72:16

Kuvhura o gazare asi eyi vana tumbura kapi nga yi horoka. Nye Karunga ga tumbwidira asi nga ka retesa po yininke oyo yoyiwa ntani Bibeli kufaturura omu nga ka yirugana.

Nye Bibeli kufaturura yoyinzi. Azo kututantera eyi twa hepa kudiva yipo tu kare vantu woruhafo nokuhafera eparu ngesi. Gazadara ko yininke eyi ayi kuretere sinka. Kuvhura yi kare yimaliwa ndi yinka yemepata ndi kuvera-vera ndi nomfa dekoro lyoge. Bibeli kuvhura zi kuvatere o lididimikire maudigu ogo ntani nokukuhengagwida pokulimburura mapuro aga:

• Morwasinke atu hepere?

• Ngapi omu natu lididimikira maudigu getu?

• Kuvhura tu gwane ruhafo mepata ndi?

• Nsene muntu ana fu kupi a zi?

• Ngatu ka mona hena vantu ava vafa ndi?

• Morwasinke twa pulira asi Karunga nga ka sikisa mo nayinye eyi ga tumbwidira?

 Mokumona asi kuna kuresa buke ezi kulikida asi ono hara kudiva eyi azi rongo Bibeli. Buke ezi nga zi kuvatera. Nkenye paragarafu kwa kara nomapuro, aga ngaga kuvatera o kwate nawa egano Bibeli. Vantu wovanzi kwa hafera kuzogera Nonombangi daJehova Bibeli. Tuna si huguvara asi nove ngo yi hafera. Karunga a ku tungike ngomu ngo diva eyi azi rongo Bibeli!