AVO otangidi zulunalu yovo tala televizau yo wunikina radio, mwawonso mwazala ye nsangu za nsoki, vita ye umpumbulu. Nanga ngeye kibeni mpe omonanga e mpasi mu kuma kia kimbevo yovo lufwa lwa muntu ozolanga.

Ukiyuvula:

• Nga i diau kikilu Nzambi kazolele kwa mono ye kwa yitu yame?

• Akweyi ndenda sololwela lusadisu mu zizidila e mpasi zame?

• Nga ova nza vesinga kala yo luvuvamu lwakieleka?

Bibila kivananga e mvutu zasikila za yuvu yayi.

• O wantu ke bemona diaka mpasi ko, nuna ngatu fwa.—Lusengomono 21:4

• ‘O koka otakuzioka nze mvanda.’—Yesaya 35:6

• ‘O meso ma mpofo memona.’—Yesaya 35:5

•  Awana bafwa bevutuka zinga diaka.—Yoane 5:28, 29

• Ke vekala diaka muntu ko oyela.—Yesaya 33:24

• Wantu awonso ova ntoto bekala ye ulolo wa madia.—Nkunga 72:16

Nanga olenda yindula vo mana otangidi muna makaya mantete ma nkanda wau ndozi ankatu kwandi. Kansi, Nzambi wasia nsilu wa vanga nsobani zazi ova ntoto, ke kolo ko ovanga zo. Bibila kisonganga una kevangila zo.

Bibila kilonganga mambu mayingi, ke mama kaka ko. Kikutuzayisanga mpe mana tufwete zaya kimana twakala ye zingu kiakiese kana nkutu owau. Yindula mambu mekutokanesanga. Kondwa nzimbu, mambu ma zingu kia nzo, mayela yovo lufwa lwa muntu ozolanga. Bibila kilenda kusadisa mu zizidila e mpasi zazi owau. Kilenda mpe kufiaulwisa mu solola e mvutu zasikila za yuvu ilende:

• Ekuma tumwenanga e mpasi?

• Aweyi tulenda sundila e mpasi za zingu?

• Nga esi nzo eto balenda kala ye kiese?

• Adieyi dikutubwilanga vava tufwanga?

• Nga tumona diaka yitu ye akundi eto ana bafwa?

• Ekuma tulenda kadila ye ziku vo Nzambi olungisa mawonso kasila o nsilu?

 Wau vo otanganga nkanda wau, disongele vo ozolele zaya mana melongwanga muna Bibila. O nkanda wau ukusadisa. Vena ye yuvu muna tini eyi ikusadisa mu toma bakula Bibila. Ndonga beyangalelanga mokena e Diambu dia Nzambi ye Mbangi za Yave. Tuna ye vuvu vo ngeye mpe oyangalala mokena yau. Yambula Nzambi kasambula e luzolo lwaku lwa longoka e Bibila.