ГЕЗИТ окуйбузбу, телевизор көрөбүзбү, радио угабызбы же Интернетке киребизби, жаңылыктардын баары эле кылмыштуулук, согуш, террорчулук жөнүндө болуп калды. Андан тышкары, ар кимдин жеке кыйынчылыктары болот. Балким, силер ооруп жаткандырсыңар же жакын адамыңардан айрылып, күйүт тартып жүргөндүрсүңөр.

Ойлонуп көрсөңөр:

• Кудай жашообуздун ушундай болушун каалады беле?

• Көйгөйлөрдү чечүүгө жардам берген кеңештерди кайдан тапса болот?

• Качандыр бир убакта жер бетине тынчтык орнойбу?

Ыйык Китепте ушул суроолордун жообу бар.

• Азыркыдай өлүм, карылык, оору деген болбойт (Аян 21:4).

• «Аксак бугудай секирет» (Ышая 35:6).

• «Сокурлардын көзү ачылат» (Ышая 35:5).

•  Өлгөндөр тирилет (Жакан 5:28, 29).

• Ооругандар болбойт (Ышая 33:24).

• Тамак-аш мол болот (Забур 72:16).

Мурунку бетте айтылган нерселерди куру кыял деп четке кагууга шашылбагыла. Кудай ал убадаларын жакында жүзөгө ашырат. Алардын кандайча жүзөгө ашырылары Ыйык Китепте түшүндүрүлөт.

Мындан сырткары, Ыйык Китепте канткенде азыр да бактылуу жашай аларыбыз айтылат. Бир азга токтоп, жүрөгүңөрдү өйүгөн нерселер тууралуу ойлонуп көрсөңөр. Балким, оорунун айынан, акчанын тартыштыгынан, үй-бүлөдөгү көйгөйлөрдөн улам же жакыныңардан айрылгандыктан кыйналып жүргөндүрсүңөр. Ыйык Китеп ушу сыяктуу кыйынчылыктарды көтөрүүгө жардам берет жана андан төмөнкүдөй суроолорго жооп алууга болот:

• Эмне себептен азап чегип жатабыз?

• Кыйынчылыктарды чечүүгө эмне жардам берет?

• Канткенде үй-бүлөбүз бактылуу болот?

• Адам өлгөндө эмне болот?

• Өлгөн жакындарыбызды кайрадан көрөбүзбү?

• Кудайдын өз убадаларын аткарарына эмне үчүн шектенбесек болот?

 Бул адабиятты окуп жатканыңардын өзү эле Ыйык Китепте чынында эмнелер жазылганын билүүнү каалаарыңарды көрсөтүп турат. Бул китептен көп пайдалуу нерселерди биле аласыңар. Ар бир абзацка суроолор берилген. Алардын жардамы менен Ыйык Китепти жакшыраак түшүнө аласыңар. Миллиондогон адамдар Ыйык Китепти Жахабанын Күбөлөрү менен ушундай ыкманы колдонуп изилдешет. Мындай ыкма силерге да жагат деп үмүттөнөбүз. Ыйык Китепти изилдеп көрүүгө жумшаган аракетиңерге Кудай батасын берсин!