KANI mwapenda inyunshipepala, mwatamba TV, neli mwakutika ku cilimba, mungabona ne kumfwa amalyashi aengi aalukulabila pa nkondo, ubungwa na bumbifi ubwingi! Cipale na mwebo mulukupenga pakuti pa bulwashi neli pakuti pa kufwilwa uwa mucisoolo.

Lipusheni ati:

• Kani ifi efi baLesa bafwaya ati fintu fibe kuli  nebo ne ba mucisoolo canji?

• Ni kwisa ningasangana ukofwako ili naba ne makatasho?

• Kani mu calo mukabapo umuntende wa cinenene?

Baibolo ilaasuka ifi ifyakwipusha.

• Abantu tabakalukusomenwapo, ukucekula, neli ukufwa.—Ukufisulula 21:4

• “Ukonaikile akasotoka koti musope.”—Yisaya 35:6

• “Ne menso  ampofu akashibulwa.”—Yisaya 35:5

•  Abafwile bakaba ne mweo na kabili.—Yoane 5:28, 29

• Takukabapo ukulwala.—Yisaya 33:24

• Abantu bonse bakakwata ifyakulya Ifingi.—Amasamo 72:16

Cipale mungalanguluka ati ifi mwapenda pa mabuula akutanga fyakwalakanya lukoso. Pano baLesa balilaile ati bakacita fyonse’fi bukumo lukoso, kabili Baibolo ilabuulishisha inshila bakacitilamo ifyo.

Baibolo ilibuulishishe na fimbi ukucila pali fyefyo. Ilatubuula ifi twelelwe ukwishiba pa kweba ati tube abasangalele pali ino mpindi. Langulukeni panini pa fimulengesheni ukubombomana. Fingaba kubulwe’ndalama, amakatasho amucisoolo, ukulwala, neli ukufwa kwa bakwabenu. Baibolo koti yamofweniko ili mwakwata amakatasho akube’fi, kabili ingamusangalasheni pa kwasuka ifyakwipusha ifili koti ni fifi:

• Nindo tupengela?

• Kani tungacita shani ili twakatashiwa mu bwikashi?

• Kani icisoolo cesu cingaba icisangalele?

• Findo ficitika kani twafwa?

• Kani tukababonapo nakabili abakwabesu abafwile?

• Findo fingatulengesha ukucetekela ati baLesa bakakonsha imilayi yabo yonse?

 Pakuti mulukupenda ili buuku cilukulangisha ati mulukufwaya ukwishiba ifi Baibolo isambisha. Ili buuku likamofweniko. Boneni ati amapalakalafu alikwete ifyakwipusha panshi ye buula, ifikamofweniko ukumfwisha Baibolo. Abantu abakuti ubwingi balalitemwesha ukusambilila Baibolo na Bamboni sha baYawe. Tulukucetekela ati na mwebo mukalitemwesha. BaLesa nga bamushukisheni ili mulukwishiba ifi Baibolo isambisha!