NI DI jurnale zø, inga televizio nja, inga ni di radio rr ná saa na, ni ka ni nja, ndirigoti ni ka ni rr bí kʉ ná lo lɨ djo, nrŭ le hwi nari djo ndirigoti fudjo le nji nari djo. Njaro ni maddi adi nzani nza, dhe dzá lodho inga nidzá ji ni ji ná le dhe dhe nari dho.

Adhuri ni tsó:

• Mungu ká ji afødi nalo madho ndirigoti madhó famiye dho?

• Ma ká ka ma ba ma tsotso kodha ngbaga ma hwini ma bani na ná kpakpa lo na d’e?

• Ngoi ro kasie ni?

Biblia ngʉ fø lo goti ngba thonga ná ngatsi.

• Nrŭ nzɨ si nzani ri, nrŭ nzɨ si ngʉ ngó ri, inga ndima dhe dhe ri.​—Ufunuo 21:4

• “Tsú tsu ná nrŭ ro si tini njegu bbai.”​—Isaya 35:6

• “Nzɨ nyo nga nja ná nrŭ nyo tso si weni we.”​—Isaya 35:5

•  Che cheni ná nrŭ si gaga.​—Yohana 5:28, 29

• Ddikpa le ro ma nziddi dhe si nji ri.​—Isaya 33:24

• Dz’ djo nga si lɨlɨ nyo na.​—Zaburi 72:16

Njaro ni ka ni ddiri i buku nă paje 4 ndirigoti paje 5 djó ni zø ná lo kʉ nyo le nyo ri. Ro Mungu pori ndi si afø di ná lo nji karr nga goti dz’ djo, ndirigoti Biblia ripo ke si rinji nji.

Biblia ddi nja lo ki maddi. Biblia kodho ringani ko nji ná lo d’ra ko dho nja koe bbʉbbʉ kʉ na hwè na ndirigoti bblo kʉ ná maisha na d’e. Addinga njedha adi bbʉ ni dho ná lo djo. Føri ka ndie mbø le kosa nari, dhe le nji nari, inga ji ni ji na le dhè nari. Biblia ka ndi kó ni tsotso nja ni hwini afø kpakpa lo tso ro d’e, ndirigoti ri ka ndi pi ni iso nja ni ba i ngadhudha goti d’e:

• Ko ká adi nzani addudho?

• Ko ká ka kò hwini kpakpalo na ngbaribbai?

• Mabbá dza nă nrŭ ká ka ndima e hwè na ddi?

• Dhe ko dhe ná saa na, ká ri adi ngba?

• Ddikpa cha ká ko ka kò nja kodhí che cheni ná nrŭ ro ddi?

• Mungu si ndi tsoni djo ná lo nji krʉ nari ká ko ka kó uu addudho?

 I buku ni zø nari na ni ridho ni ji ni chú Biblia ddi ná lo. I buku si ni tsotso ko ko. Paragrafu djò le dhu ná ngadhudha ka ndiko ni tsotso ni famu Biblia nă lo. Bí kʉ ná nrŭ adi riji ndima tilo Biblia nă lo djo Yova dzá dimu na. Ni ma ka ni jiri ni njiri fø i. Mungu le ni ronga ni kpakpanga nji ni chú Biblia ddi nalo nari dho!