NA mwabelenga nyusipepala, kukutika pawailesi na pa TV, mulanyumfwa akweebela makani atokwaamba pa bakapondo, inkondo, akucayana. Mpashi amwebo mulicite mapensho mbuli kuciswa na kufwitwa muntu ngomusuni.

Amuliipushe ayi:

• Sa ubu mbobuumi Lesa mbwaasuni ayi nebo amukwashi wangu tunookala?

• Ino nkuli nkweenga ndacana lucafwo kwaamba ayi ncikoonshe kuliyumya mumapensho?

• Sa kulaakubawo luumuno lwancinencine?

Baibo ilapa shikumbulo shikwene kumiipusho iyi.

• Bantu teshi bakanyumfwewo kucisa, kucembela, nabi kufwa.—Ciyubululo 21:4

• “Balema balakutangala anga ninsefu.”—Isaya 35:6

• “Boofu balaakubona.”—Isaya 35:5

•  Bafu balaakubushikwa.—Joni 5:28, 29

• Teshi kukabeewo kuciswa.—Isaya 33:24

• Teshi kukabeewo nsala.—Kulumbaisha 72:16

Ncuubu kuyeeya ayi nshomweeya kumatalikilo alibuku ili nshakuyeeyelabo. Sombi Lesa washomesha ayi alaakushicita conoonobo pacishi ca panshi, alimwi Baibo ilasansulula mbweshi akacite boobo.

Baibo ilatulwiitaako aamwi makani. Ilatulwiita nshotweelete kucita kwaamba ayi tucane lusangalalo lwancinencine akukala buumi bubotu pacecino ciindi. Kwakaciindi kaniinibo amuyeeye pashintu shimusukamika. Shintu isho inga shaba kubula maali, mapensho mumukwashi, kuciswa, na kufwitwa muntu ngomusuni. Baibo inga yamucafwa kuliyumya mumapensho aya, akumuyuminisha kwiinda mukupa shikumbulo kumiipusho mbuli:

• Ino nceebonshi tulapenga?

• Ino inga twaliyumya buyani na twaba mumapensho?

• Ino nciinshi ceenga catupa lusangalalo mumukwashi?

• Ino nciinshi cicitika na muntu wafwa?

• Sa tulaakubabonawo alimwi beshicibusa besu bakafwa?

• Ino nciinshi ceenga catupa kushoma kwaamba ayi Lesa alaakukumanisha shoonse nshaakashomesha?

 Kubelenga kwanu libuku ili kulatondesha ayi mulisuni kwiiya Baibo nshoiisha. Libuku ili lilaakumucafwa. Mapalagilafu oonse alicite miipusho yeshi ikamucaafwe kunyumfwisha kabotu Baibo. Bantu baanji balakondwa kwiiya Baibo aBakamboni Bakwe Yehova. Tulishomete kwaamba ayi amwebo mulaakukondwa. Aamupe shoolwe Lesa ndyemutokwiiya Baibo nshoiisha!