SHI utange julunale ye-yense, utale televijo, nansha kulonda ladiyo, ukamona ne kwivwana myanda mivule ya butapani, ya mavita, ne ya butumbula. Padi abe mwine ususukanga na misongo nansha kufwilwa muntu osenswe.

Wiipangule amba:

• Le Leza usakanga ami ne kisaka kyetu tutanwe na bino bintu?

• I kwepi konkatana bukwashi mwa kulwila na makambakano ami?

• Lelo ndoe ya bine ikekala’ko’tu?

Bible uleta malondololo a bine ku bino bipangujo.

• Bantu kebakevwanapo monka misanshi, kununupa nansha kufwa.​—Kusokwelwa 21:4

• “Usunkuta ukatumbuka’nka bwa kasha kalume.”​—Isaya 35:6

• “Meso a bampofu akapūtulwa.”​—Isaya 35:5

•  Bantu bafwile bakasangulwa.​—Yoano 5:28, 29

• Kekukekalapo wa kubela.​—Isaya 33:24

• Muntu ense pano pa ntanda ukekala na byakudya bivule.​—Ñimbo ya Mitōto 72:16

Ubwanya kulanga bukidibukidi amba myanda yowatanga mu mapaje mabajinji a kino kitabo i bilotwa. Inoko Leza i mulaye kufikidija panopano ponka ino myanda pano pa ntanda, kadi Bible i mushintulule muswelo wasa kwiifikidija.

Kadi kekupwilepo. Bible witusapwila ne byobya byotufwaninwe kuyuka mwa kwikadila na nsangaji ya binebine tamba’nka pano. Vuluka’po bidi bintu bikuletelanga moyo. Padi i kubulwa lupeto, makambakano mu kisaka, misongo, nansha lufu lwa muntu osenswe. Bible ubwanya kukukwasha ulwe na ino myanda, kadi ubwanya kukusenga na kuleta malondololo ku bino bipangujo:

• Mwanda waka tususuka?

• Le tukokeja kunekenya makambakano etu namani?

• Le tubwanya kwikala na nsangaji mu kisaka kyetu?

• Lelo shi muntu wafu wikalanga namani?

• Le tukemona monka na baswe betu bafwile?

• Mwanda waka tubwanya kukulupila’mba Leza usa kufikidija byonso byalaile?

 Kutanga kotanga kino kitabo kulombola’mba usakanga kuyuka byobya bifundija Bible. Kino kitabo kisa kukukwasha. Mudi bipangujo bya misango, bine bikakukwasha wivwanije Bible senene. Bantu bavule basenswe kwisamba myanda idi mu Bible na Batumoni ba Yehova. Tukulupile amba nobe bisa kukusangaja. Tulomba Leza akwesele pano powifunda kuyuka byobya bikufundija Bible!