KA ISOMO gaset, king’iyo televison, kata kiwinjo redio, ibiro yudo weche mang’eny mag mahundu, lwenje, kod mamoko. Nyalo bedo ni tuo moro chandi, kata ni in gi kuyo nikech ilalo ng’at moro mihero e tho.

Penjri ane niya:

• Be kama e kaka Nyasaye ne dwaro ni ngimana kod mar joodwa obed?

• Ere kama anyalo yudoe kony mar nyagruok gi chandruoge?

• Be chieng’ moro kuwe nobedie e piny?

Muma chiwo dwoko makare e wi penjogo.

• Ji ok nowinj rem, ok ginibed moti kata tho.​—Fweny 21:4

• “Jo ma ong’ol nochikre ka ngau.”​—Isaya 35:6

• “Muofni biro neno.”​—Isaya 35:5

•  Jomotho nobed mangima kendo.​—Johana 5:28, 29

• Onge ng’at ma biro bedo matuo.​—Isaya 33:24

• Chiemo nobed mang’eny e piny.​—Zaburi 72:16

Inyalo paro ni weche mowach e ite mar ang’wen kod abich mar bugni ok nyal timore. Kata kamano, Nyasaye osesingo ni obiro kelo lokruogego e piny ka, kendo Muma lero kaka obiro timo kamano.

Bende, Muma nyisowa gik ma dwarore ni watim mondo wabed mamor e ngima ma wadakie sani. Par ane matin kuom gik ma nyalo bedo ni chandi sani. Nyalo bedo ni gin weche mag pesa, weche mag ot, tuo moro, kata tho mar ng’at moro mihero. Muma nyalo konyi ng’eyo kaka inyalo nyagori gi chandruogego. Bende, onyalo hoyo chunyi kuom miyi dwoko mag penjo kaka:

• Ang’o momiyo wachandore?

• Ere kaka wanyalo nyagore gi chandruoge?

• Wanyalo timo ang’o mondo joodwa obed gi mor kod kuwe?

• Be jomotho ong’eyo gimoro amora?

• Be chieng’ moro wanane jowa mosetho kendo?

• Ere kaka wanyalo bedo gadier ni Nyasaye biro timo gigo duto mosesingo?

 Nikech isomo bugni gie sani, mano nyiso ni idwaro ng’eyo gima Muma puonjo. Bugni biro konyi timo kamano. En gi penjo ma dwokogi yudore e paragraf, kendo penjogo biro konyi winjo tiend puonj mag Muma e yo mayot. Ji mang’eny osepuonjore Muma gi Joneno mag Jehova. Wageno ni in bende ibiro timo kamano. Nyasaye oguedh kinda mitimo mondo ipuonjri Muma.