CHANCHINBU i chhiar a, TV i en a, radio i ngaihthlâk hian, dân bawhchhiatna te, indona te, leh firfiaka chêtna te i hmuin, i hre ṭhîn a. Natna i vei emaw, i hmangaih tak i sûn emaw avângin nangmah ngei pawhin hrehawm i tuar pawh a ni thei.

Heti hian inzâwt rawh:

• Hei hi maw kei leh ka chhûngte tâna Pathian duh zâwng chu?

• Khawiah nge ka buainate hmachhawn thei tûra ṭanpuina chu ka hmuh ang?

• Remna dik tak a awm ngai ang em?

Bible chuan hêng zawhnate chhânna rin tlâk tak chu a pe a ni.

• Mite chuan nâ an tuar tawh lo vang a, an tarin, an thi tawh hek lo vang.—Thu Puan 21:4

• “Kebaite chu sakhi angin an zuang ang.”—Isaia 35:6

• “Mitdelte mit chu tihmenin a awm ang.”—Isaia 35:5

•  Mitthite chu kaihthawh an ni ang.—Johana 5:28, 29

• Dam lo an awm tawh lo vang.—Isaia 33:24

• Leia mi zawng zawng tân ei tûr tam tak a awm ang.—Sâm 72:16

Phêk hmasa lama i thu chhiarte chu duhthusâm thil maia ngaia hnâwl mai chu a awlsam ngei ang. Mahse Pathianin chûng inthlâk danglamnate chu a rawn thlentîr thuai ang a, Bible-in a thlâkthleng dân tûr pawh min hrilh a ni.

Bible chuan chu aia tam min hrilh a. Tûn ngeia nun hlimawm tak kan neih theih nâna kan hriat ngaite pawh min hrilh a ni. Lungkhamna neitîrtu che thilte chu han ngaihtuah lawk teh. Sum leh pai leh chhûngkaw lama harsatna bâkah, hrisêl ṭhat lohna, a nih loh leh i hmangaih tak tuemaw sûnnate a tel thei ang. Bible chuan hêng buainate hmachhawn tûrin a ṭanpui thei che a, hêng zawhnate chhângin a thlamuan thei bawk che:

• Eng vângin nge hrehawm kan tawrh?

• Engtin nge kan buainate kan hmachhawn theih?

• Kan chhûngkua a hlim thei ang em?

• Kan thih hian kan chungah eng nge lo thleng?

• Kan hmangaih thi tawhte chu kan hmu leh thei ang em?

• Engvângin nge Pathianin a thutiam zawng zawng a hlen ang tih kan rin theih?

 A nihna takah chuan, he lehkhabu i chhiarna hian Bible zirtîrna hriat i duhzia a târ lang tawh a. He lehkhabu hian a ṭanpui ang che. Bible hre thiam lehzual tûra ṭanpuitu atân, paragraph-te hian zawhna a nei a ni. Mi tam tak chuan Jehova Thuhretute nêna Bible sawihona neih chu nuam an ti a. Nang pawhin nuam i tih ve kan beisei. Bible zirtîrna i hmuh chhuah belh zêl hian, Pathianin malsâwm che rawh se!