AT NIM tqanil kyoj periódico, toj televisión, toj radio ex toj Internet tiʼj nim nya bʼaʼn, kyiʼj nimaq qʼoj ex tiʼj qʼoj tuʼn kytzaj xobʼ txqantl tuʼn. Bʼalo ax ikx teya in nikʼx nim kʼixkʼoj tuʼna tuʼnju at jun yabʼil tiʼja moqa tuʼnju o kyim jun xjal kʼujlaʼn tuʼna.

Xjelinkuya jlu:

• ¿Ape jlu taj Dios te weye ex kye toj njaye?

• ¿Jatumel jaku kanet onbʼil wuʼne tuʼn wexe kywitz nya bʼaʼn?

• ¿Kpolpe jun qʼij jatumel ktel mujbʼabʼil tzalu twitz Txʼotxʼ?

In tzaj tqʼoʼn Tyol Dios tzaqʼwebʼil kyiʼj xjel lu ex jaku tzʼok qeʼ qkʼuʼj tiʼj.

• Miʼn tzajtl kʼixkʼoj kyiʼj xjal, mlay che tijen ex mlay che kyim (Apocalipsis 21:4).

• «Che jawil tʼikpaj qe kox ik tzaʼn masat» (Isaías 35:6).

• «Kjaqetel kywitz qe moẍ» (Isaías 35:5).

•  Che jawil anqʼin kyimni (Juan 5:28, 29).

• Ni jun xjal kyabʼtel (Isaías 33:24).

• Ok ktel wabʼj kye kykyaqil xjal (Salmo 72:16).

Jakulo kubʼ t-ximana qa noq jun witzikʼ aju ma jaw tuʼjina toj tnejel t-xaq uʼj lu. Noqtzun tuʼnj, o tzaj ttziyen Dios qa chʼix kybʼant chʼixpubʼil lu tuʼn tzalu twitz Txʼotxʼ, ex in tzaj tchikʼbʼaʼn Xjan Uʼj tzeʼn kbʼantel tuʼn.

Ax ikx in tzaj tqʼamaʼn Tyol Dios qe tzeʼn jaku qo tzalaj kyukʼil toj qja toj ambʼil jaʼlo. Ximana kyiʼj qeju tiʼchaq in tzaj bʼaj tkʼuʼja tuʼn. Bʼalo in tzaj nya bʼaʼn kyxole kyukʼil toj tjaya, tuʼn tpaj jun yabʼil moqa tuʼnju mintiʼxix kypwaqe. Axlo ikx in tzaj bʼaj tkʼuʼja tuʼnju o kyim jun xjal kʼujlaʼn tuʼna. Jaku tzʼonin Tyol Dios tiʼja tuʼn texa kywitz nya bʼaʼn lu. Ax ikx jaku tzaj qʼuqbʼaʼn tkʼuʼja tuʼn, tuʼnju in tzaj tqʼoʼn tzaqʼwebʼil kyiʼj xjel lu:

• ¿Tiquʼn in tzaj nya bʼaʼn qiʼj?

• ¿Tiʼ kʼonil qiʼj tuʼn qex kywitz nya bʼaʼn in che tzaj qiʼj?

• ¿Tiʼ jaku bʼant quʼn tuʼn qtzalaj kyukʼil toj qja?

• ¿Tiʼ in tzaj qiʼj aj qkyim?

• ¿Okpetzulo che okel qkeʼyin juntl maj qe toj qja o che kyim?

• ¿Tiquʼn qʼuqli qkʼuʼj tiʼj qa kjapunel tkyaqilju o tzaj ttziyen Dios?

 Qa in nuʼjina tiʼj uʼj lu, in tzaj tyekʼin jlu qa taja tuʼn tel tnikʼa tiʼjju in tzaj t-xnaqʼtzaʼn Tyol Dios. Ex kʼonil uʼj lu tiʼja tuʼn tel tnikʼa tiʼj. Ax ikx, che onil qeju xjel tkubʼ tiʼj junjun taqikʼ tuʼntzun telxix tnikʼa tiʼj Tyol Dios. At nimxix xjal o che tzalaj tuʼn kyyolin kyukʼil testigos de Jehová tiʼj Tyol Dios. Kuchiwt ax jlu kbʼel tnaʼna. ¡Awt Dios tzʼonin tiʼja tuʼnju in nok tilil tuʼna tuʼn tel tnikʼa tiʼjju in tzaj t-xnaqʼtzaʼn Xjan Uʼj!