KJA periódico, kja televisión ñe kja radio, gi unꞹ nguenrra ke na punkjꞹ ntee kjaji yo me na sʼoo, chu̱ji ñe bʼꞹbʼꞹ yo pje nrre kjaji ngekʼua ya me su̱trjo yo ntee. Bʼꞹma gi sødye o go nrru̱u̱ na ntee ke me mi sʼiyage.

Bʼꞹma gi nee ri pa̱rge:

• ¿Mi nee e Yose ro mimi akjaba in pjamiliago?

• ¿Kjo ra jokꞹ yo ndumꞹ yo ri pɇsʼigø?

• ¿Jingua ra mimiji na joo?

Ne Biblia mama ja ga kja yo trʼønꞹ yo junsʼꞹba ngekʼo ri pa̱ra̱.

• Dya kja ra zøji ja na ꞹꞹ, dya kja ra titaji ñe dya kja ra ndu̱ji (Apocalipsis 21:4).

• “Kʼꞹ dya søø ra nzhodʼꞹ ra dʼakʼꞹ.” (Isaías 35:6)

• “Yo ngoro ra jñanrraji.” (Isaías 35:5)

•  Ra yepe ra mimi kʼo ya nrru̱u̱ (Juan 5:28, 29).

• Dya kjo ra zødye (Isaías 33:24).

• Ra jyⱥⱥ pje ra sʼii (Salmo 72:16).

Bʼꞹma ri mbeñe ke nu yo bi xørge axꞹtjꞹ kja ne skuama dya ra zⱥdʼⱥyo. Pe e Mizhokjimi mama ke dya kja ra mezhe ma ra tsjaa kja ne xoñijomꞹ yo a bi xørge. Ne Biblia mama ja rga tsjayo.

Pe dya ngextrjoyo ri pjechi kja ne Biblia. Xo ri pa̱ra̱ ja rgi tsjaa ngekʼua ri mⱥjⱥ rgi mimi. Mbeñe pje ma nrrumꞹ gi kjogꞹ, bʼꞹma dya gi pɇsʼi merio o in pjamilia kjogꞹ nrrumꞹ, bʼꞹma xo gi sødyege o go nrru̱u̱ nukʼꞹ mi jobige. Kja ne Biblia ri chøtrʼꞹ pje ri tsjaa ma ri tsjogꞹ nrrumꞹ, ñe ra zøʼø na joo in mꞹbʼꞹ ma ri pa̱ra̱ ja ga kjaa yo trʼønꞹ yo mamaba:

• ¿Pjenga ri supjreji?

• ¿Pje ra kjaji ma ra kjogꞹji ndumꞹ?

• ¿Pje søø ra tsjaa in pjamilia ngekʼua ra mⱥji?

• ¿Pje kjogꞹ ma ri tu̱ji?

• ¿Kjo ra yepe ra jandaji kʼo ya ndu̱u̱?

• ¿Pjenga søø ra ejmeji ke e Mizhokjimi ra tsjaa kʼo ya mama?

 Ma na xørge ne skuama jñetse ke gi nee ri pa̱ra̱ yo mama ne Biblia. Ne skuama ra mbøxkʼꞹ ri tsjageyo. Nzi na párrafo bʼꞹbʼꞹ trʼønꞹ ke ra mbøxkʼꞹ ngekʼua ri meya yo mama ne Biblia. Na punkjꞹ ntee me mⱥji ma yo testigo e Jehová jichiji yo mama ne Biblia. Ri negøjme ke xo ri mⱥjⱥ nzakja angezeji. Ri øtꞹjme Mizhokjimi ra mbøxkʼꞹ ngekʼua ri pa̱ra̱ yo mama ne Biblia.