NA MAMAKY gazety ianao, na mijery tele, na mihaino radio, dia misy resaka olon-dratsy sy ady ary zavatra ratsy be foana! Mety hoe ianao mihitsy koa no marary, na nisy maty ny havanao akaiky.

Eritrereto hoe:

• Izao ve no tian’Andriamanitra hiainako sy hiainan’ny fianakaviako?

• Iza no mba afaka manampy ahy amin’izao mahazo ahy izao?

• Mba hisy ihany ve izany fiadanana izany?

Mamaly an’ireo fanontaniana rehetra ireo ny Baiboly.

• Ny olona tsy hijaly intsony, na ho antitra, na ho faty.—Apokalypsy 21:4

• Hatanjaka ny malemy tongotra, ka ho afaka hitsambikina.—Isaia 35:6

• ‘Hahiratra ny mason’ny jamba.’—Isaia 35:5

•  Hatsangana ny maty.—Jaona 5:28, 29

• Tsy hisy harary intsony ny olona.—Isaia 33:24

• Hanana sakafo be dia be ny olon-drehetra.—Salamo 72:16

Mety tonga dia hieritreritra ianao hoe: ‘Izany ve tsy nofy ihany?’ Andriamanitra mihitsy anefa no nampanantena fa tena hataony ireo, ary tsy ho ela. Hazavain’ny Baiboly hoe ahoana no hanaovany an’izany.

Ankoatra izany koa, dia atoron’ny Baiboly hoe inona no tokony hatao raha te ho sambatra sy ho afa-po amin’ny fiainana, dieny izao. Diniho kely ange e! Inona izao no tena mampiasa saina anao? Tsy manam-bola ve, ohatra, ianao, sa mikorontana ny tokantranonao? Marary ve ianao, sa misy maty ny havanao? Afaka mampahery anao sy manampy anao amin’izany ny Baiboly. Valiana ao, ohatra, ireto:

• Nahoana isika no mijaly?

• Ahoana no hataoko amin’izao olana mahazo ahy izao?

• Afaka ny ho sambatra ve izahay mianakavy?

• Lasa aiza ny olona rehefa maty?

• Mbola ho hitantsika ve ireny havantsika efa maty ireny?

• Azo antoka ve fa hotanterahin’Andriamanitra daholo ny zavatra nampanantenainy?

 Te hahafantatra an’izay ampianarin’ny Baiboly ianao, matoa mamaky an’ity boky ity. Jereo àry ireo fanontaniana eny ambany pejy, satria hanampy anao hahazo kokoa an’izay lazain’ny Baiboly izany. Olona an-tapitrisany no tia mianatra Baiboly miaraka amin’ny Vavolombelon’i Jehovah. Manantena izahay fa ho tianao koa izany. Enga anie ka hotahin’Andriamanitra ianao rehefa mianatra Baiboly!