NDI mwawelenga muli nyunzipepala, nanti ndi mwatamba pa TV, nanti kukutika kuli ledyo, ala mumauvwa malyasi pa vintu iviipe ivikucitika umu nsi, wakwe, unkalwe, inkondo, nu upondo uwipisye. Limwi namwe kwene mukacula pa mulandu nu kulwala, nanti pa mulandu nu kufwilwa.

Yuzyini mweineco muti:

• Uzye vii vili vino Leza akalonda ukuti vyancitikila pamwi na ya lupwa yane?

• Aekwi kuno ningazana uwazwilizyo pakuti naya ni nsansa nanti vintu vyantalila?

• Uzye kulatala kuye umutende wa cumi pano nsi?

Baibo ika-asuka ningo sana amauzyo yaa.

• Antu yatalaawaika, yatalaakota, nanti ukufwa.​—Umbwilo 21:⁠4

• ‘Ivilema vilatoloka wa nswela.’​—Ezaya 35:​6

• ‘Amanso ya mpafu yalalola.’ ​—Ezaya 35:5

•  Antu afwe yalatuutuluka. ​—Yoane 5:​28, 29

• Kutalaya ukulwala. ​—Ezaya 33:⁠24

• Antu yonsi pano nsi yalakwata ivyakulya ivingi. ​—Masamu 72:⁠16

Limwi mungelenganya ukuti ivyeo vino mwawelenga pa mafwa ya kutandikilako umwi buku lii vitanga vicitike. Nomba Leza walaya ukuti alacita ivintu vivyo pano nsi, nupya aelikwene sile; nakapya Baibo yatulondolwela na vino alacita pa kuzifya ivintu.

Kwaya navyuze ivingi vino Baibo ikatusambilizya. Ikatunena vino tulinzile ukumanya pakuti twaya ni nsansa zya cumi na ndakai kwene. Tale elenganyini pa vintu ivikamusakamika. Limwi, u kwakuzana impiya, nanti vya kusunga ningo ulupwa, kulwalilila, nanti ukufwilwa. Baibo ingamwazwa ukutunguluka na lino muli ni ntazi zizyo, napya ingamuteekezya ndi mwalola vino ika-asuka mauzyo wakwe yaa:

• U mulandu ci uno tukaculila?

• Tungacita uli ndi twaponelwa ni ntazi?

• Uzye tungaya ni nsansa pa ng’anda?

• Uzye umuntu ndi wafwa cikaaya uli?

• Uzye yalupwa itu afwa tulatala tuyalolepo nupya?

• Tungasininkizya uli ukuti Leza alacita vyonsi vino walaya??

 Vino mukuwelenga ibuku lii, cikulangilila ukuti mukulonda ukumanya vino Baibo ikasambilizya. Ibuku lii lilamwazwa sana. Mapalagalafu aayamo yakwata amauzyo apisika aangamwavwa ukuvwikisya ningo vino Baibo ikasambilizya. Antu imintapendwa yatemwa sana ukulanzyanya ivyaya muli Baibo na ya Nte Yakwe Yeova. Tukutaila ukuti namwe mulatemwa. Leza amupoleelele lino mukusambilila nu kumanya vino Baibo ikasambilizya!