കുറ്റകൃത്യം, യുദ്ധം, ഭീകരപ്രവർത്തനം എന്നിവയെക്കുറിച്ചുള്ള വാർത്തകളാണ്‌ പത്രത്തിലും ടിവി-യിലും റേഡിയോയിലും ഏറെയും നിറഞ്ഞുനിൽക്കുന്നത്‌. ഒരുപക്ഷേ നിങ്ങൾതന്നെ രോഗം മൂലമോ പ്രിയപ്പെട്ടവരുടെ വേർപാടു നിമിത്തമോ വേദന അനുഭവിക്കുന്നുണ്ടാകും.

ഒന്നു ചിന്തിച്ചുനോക്കൂ:

• ഞാനും എന്‍റെ കുടുംബവും ഇങ്ങനെ ജീവിക്കാനാണോ ദൈവം ആഗ്രഹിക്കുന്നത്‌?

• പ്രശ്‌നങ്ങൾ നേരിടാനുള്ള സഹായം എനിക്ക് എവിടെനിന്ന് കിട്ടും?

• ശരിക്കും സമാധാനമുള്ള ഒരു കാലം എന്നെങ്കിലും വരുമോ?

ഈ ചോദ്യങ്ങൾക്കുള്ള തൃപ്‌തികരമായ ഉത്തരം ബൈബിളിലുണ്ട്.

• ഇനി ആരും വേദന അനുഭവിക്കില്ല; ആർക്കും വയസ്സാകില്ല; ആരും മരിക്കില്ല.—വെളിപാട്‌ 21:4

• “അന്നു മുടന്തൻ മാനിനെപ്പോലെ ചാടും.” —യശയ്യ 35:6

• “അന്ന് അന്ധന്‍റെ കണ്ണുകൾക്കു കാഴ്‌ച ലഭിക്കും.”—യശയ്യ 35:5

•  മരിച്ചവരെ വീണ്ടും ജീവനിലേക്കു കൊണ്ടുവരും.—യോഹന്നാൻ 5:28, 29

• ആർക്കും രോഗം വരില്ല.—യശയ്യ 33:24

• ഭൂമിയിലുള്ള എല്ലാവർക്കും ഇഷ്ടംപോലെ ആഹാരമുണ്ടായിരിക്കും.—സങ്കീർത്തനം 72:16

ഈ പുസ്‌തകത്തിന്‍റെ ആദ്യപേജുകളിൽ വായിച്ച കാര്യങ്ങൾ വെറുമൊരു സ്വപ്‌നംപോലെ തോന്നിയേക്കാം. എന്നാൽ പെട്ടെന്നുതന്നെ ഈ മാറ്റങ്ങൾ ഭൂമിയിൽ കൊണ്ടുവരുമെന്നു ദൈവം വാഗ്‌ദാനം ചെയ്‌തിരിക്കുന്നു. ദൈവം അത്‌ എങ്ങനെ ചെയ്യുമെന്നു ബൈബിളിൽ വിശദീകരിച്ചിട്ടുണ്ട്.

എന്നാൽ അതു മാത്രമല്ല ബൈബിൾ നമ്മളോടു പറയുന്നത്‌. ഇപ്പോൾത്തന്നെ സന്തോഷമുള്ള ഒരു നല്ല ജീവിതം ആസ്വദിക്കാൻ അറിഞ്ഞിരിക്കേണ്ട കാര്യങ്ങളും ബൈബിളിലുണ്ട്. നിങ്ങളെ വിഷമിപ്പിക്കുന്ന കാര്യങ്ങളെക്കുറിച്ച് ഒന്നു ചിന്തിക്കുക. ഇത്‌ ഒരുപക്ഷേ സാമ്പത്തികബുദ്ധിമുട്ടാകാം, കുടുംബപ്രശ്‌നങ്ങളാകാം, അസുഖങ്ങളാകാം, അല്ലെങ്കിൽ പ്രിയപ്പെട്ടവരെ നഷ്ടപ്പെട്ടതിന്‍റെ വേദനയാകാം. ഇത്തരം പ്രശ്‌നങ്ങളെ നേരിടാൻ ബൈബിൾ സഹായിക്കും. താഴെ കൊടുത്തിരിക്കുന്നതുപോലുള്ള ചോദ്യങ്ങൾക്ക് ഉത്തരം നൽകിക്കൊണ്ട് ബൈബിൾ നിങ്ങളെ ആശ്വസിപ്പിക്കും:

• നമ്മൾ കഷ്ടപ്പാടും ദുരിതവും അനുഭവിക്കുന്നത്‌ എന്തുകൊണ്ടാണ്‌?

• ജീവിതപ്രശ്‌നങ്ങളെ നമുക്ക് എങ്ങനെ നേരിടാം?

• നമ്മുടെ കുടുംബത്തിനു സന്തോഷത്തോടെ ജീവിക്കാനാകുമോ?

• മരിക്കുമ്പോൾ നമുക്ക് എന്തു സംഭവിക്കുന്നു?

• മരിച്ചുപോയ പ്രിയപ്പെട്ടവരെ നമുക്ക് എന്നെങ്കിലും കാണാനാകുമോ?

• തന്‍റെ വാഗ്‌ദാനങ്ങളെല്ലാം ദൈവം നിറവേറ്റുമെന്നതിന്‌ എന്ത് ഉറപ്പാണുള്ളത്‌?

 നിങ്ങൾ ഈ പുസ്‌തകം വായിക്കുന്നത്‌, ബൈബിൾ പഠിപ്പിക്കുന്നത്‌ എന്താണെന്ന് അറിയാൻ ആഗ്രഹമുള്ളതുകൊണ്ടാണ്‌. ഈ പുസ്‌തകം ആ ആഗ്രഹം നിറവേറ്റും. ഓരോ ഖണ്ഡികയ്‌ക്കും ചോദ്യമുണ്ട്. ബൈബിളിൽ പറഞ്ഞിരിക്കുന്നതു നന്നായി മനസ്സിലാക്കാൻ അതു സഹായിക്കും. യഹോവയുടെ സാക്ഷികളോടൊപ്പം ബൈബിൾവിഷയങ്ങൾ ചർച്ച ചെയ്യുന്നതു രസകരമാണെന്നു ലക്ഷക്കണക്കിന്‌ ആളുകൾ കണ്ടിരിക്കുന്നു. നിങ്ങൾക്കും അത്‌ ഇഷ്ടമാകുമെന്നു കരുതുന്നു. അങ്ങനെ ബൈബിൾ പഠിപ്പിക്കുന്നത്‌ എന്താണെന്നു നിങ്ങൾ കണ്ടെത്തും. നിങ്ങളുടെ ശ്രമത്തെ ദൈവം അനുഗ്രഹിക്കട്ടെ!