WILERIGI jornal, woonaga televizawu obe wavuruwanaga dhopadduwa muradiyoni, onowiwa koddo, opanga ni ngovi. Podi wera mwigumini mwawo onna woona goyi mwaha woredda, obe mwaha wookwa mmudhaawo.

Vano podi wera onowikoha:

• Egumi agifunana Mulugu vamodha naamudhaga siyela?

• Enagikavihere ddiniyani wihina givilelena makathamiho?

• Murenddele onere okalawo mwilaboni?

Bibliya onowawakula makoho ala.

• Kawindha wikala wuluvala, okwa naari widdela.—Apocalipse 21:4

• ‘Aliba oragala enerege othamaga ninga naase.’—Isaías 35:6

• ‘Mento aaliba ohona enerege woona.’—Isaías 35:5

•  Anookwa enere ohogolowela okalawo.— João 5:28, 29

• Kaavo onakalege muredda.— Isaías 33:24

• Dhoojha kadhinaarameyege.— Salmos 72:16

Podi woneleyagamo wi mpaganyo dha Mulugu kadhinereya. Mbwenye kahiyo odduwala wi mwinyene Mulugu ohusoriha wihina dhatedhene giwogilimi kahiyo dhego dhowoota, mohanganyedha dhinere wereya. Bibliya onosoriha pamadhene makalelo Mulugu onakwanihiye mpaganyo dhaye.

Ohiya owogave bahi dhego dhosogolo, Bibliya peeno ononikavihera okala athu oohagalala. Kubuwela dhego dhinuwitha mwiili. Podi wera korowa dhinowurameya obe vamuralani vawo vihikala magudhulano, po di wera ohukweliwa mmudhaawo, mukwawo obe ohukanna oredda onuwoniha goyi. Wamuhudhera Bibliya, onere wagonjhiha makathamiho enuufwanya ni onere odhiveliwa makalelo Bibliya onawakuliye makoho ala:

• Goyi ethabwele ddi?

• Nnande addi wagonjhiha makathamiho ehu?

• Onande addi okanna murala wohagalasa?

• Enanipadduwela ddi nakwa?

• Winere okalawo ovenyihiwa wanookwa?

• Nnande addi okanna ebaribari wi Mulugu onere wakwaneliha mpaganyo dhaye?

 We akala onowileri livuru nna, onowoneyiha wi onofuna wonelamo dhinasoriha Bibliya. Livuru nna, nnere wukavihera. Ddima dhatedhene dhiri mulivuruni muna, dhihikanna makoho enakavihera omonelamo pama Bibliya. Matxikwi ni matxikwi aathu, ehidhiveliwa ni anamona a Yehova, mwaha wothapanyedha naaliwa makoho eri mulivuruni muna. Nihikanna ejhehedho wihina onere odhiveliwa. Nnojhehedha wi okanne mareeliho a Mulugu, wilibihedhaga wonelamo dhinasoriha Bibliya.