जेव्हा तुम्ही पेपर वाचता, टीव्ही पाहता किंवा रेडिओ ऐकता तेव्हा सहसा गुन्हेगारी, युद्ध, दहशतवाद यांविषयीच्याच बातम्या असतात. कदाचित तुम्ही स्वतः एखाद्या आजाराने पीडित असाल किंवा तुमच्या प्रिय व्यक्तीचा मृत्यू झाला असेल.

तुम्ही कदाचित म्हणाल:

• माझ्यासाठी आणि माझ्या कुटुंबासाठी देवाची हीच इच्छा आहे का?

• माझ्या समस्यांना तोंड देण्याकरता मला मदत कुठून मिळेल?

• आपल्याला कधी खरी शांती अनुभवता येईल का?

या प्रश्नांची समाधानकारक उत्तरं बायबलमध्ये दिली आहेत.

• लोकांना कोणत्याही प्रकारचं दुःख सहन करावं लागणार नाही, ते म्हातारे होणार नाही किंवा मरणारही नाहीत.—प्रकटीकरण २१:४

• “तेव्हा लंगडा हरणाप्रमाणे उड्या मारेल.”—यशया ३५:६

• “अंधांचे नेत्र उघडतील.”—यशया ३५:५

•  मृत लोकांना जिवंत केलं जाईल.—योहान ५:२८, २९

• कोणीही आजारी पडणार नाही.—यशया ३३:२४

• पृथ्वीवर सर्वांसाठी भरपूर अन्न असेल.—स्तोत्र ७२:१६

या पुस्तकाच्या सुरुवातीच्या पानांवर सांगितलेल्या गोष्टी नुसत्या कल्पना आहेत, असा तुम्ही विचार कराल. पण, खूप लवकर पृथ्वीवर हे बदल करण्याचं वचन देवाने दिलं आहे आणि ते तो कसं पूर्ण करणार आहे ते बायबलमध्ये सांगितलं आहे.

बायबलमध्ये इतरही विषयांवर माहिती दिली आहे. आजच्या जीवनात खरं सुख मिळवण्यासाठी काय करण्याची गरज आहे, हेही बायबलमध्ये सांगितलं आहे. तुम्हाला चिंता वाटत असलेल्या गोष्टींवर थोडा विचार करा. यात कदाचित, पैशांची, कुटुंबाची, बिघडत चाललेल्या तुमच्या तब्येतीची किंवा तुमच्या प्रिय व्यक्तीच्या मृत्यूमुळे येणारी चिंता असू शकेल. पण याही चिंतांवर मात करण्यासाठी बायबलमध्ये मदत पुरवली आहे. शिवाय, त्यात पुढे दिलेल्या प्रश्नांची समाधानकारक उत्तरं असल्यामुळे तुम्हाला सांत्वन मिळू शकेल. जसं की:

• आज आपल्याला दुःख का सहन करावं लागतं?

• आपण आपल्या समस्यांचा यशस्वी रीत्या सामना कसा करू शकतो?

• आपलं कुटुंब आनंदी होऊ शकेल का?

• मेल्यानंतर आपलं काय होतं?

• मरण पावलेल्या आपल्या प्रिय जनांना आपण पुन्हा भेटू शकू का?

• देवाने वचन दिलेली प्रत्येक गोष्ट तो पूर्ण करेल, अशी आपण खातरी का बाळगू शकतो?

 तुम्ही या पुस्तकाचा अभ्यास करायला तयार झालात यावरून कळतं, की तुम्हाला बायबलमधल्या शिकवणी माहीत करून घ्यायच्या आहेत. या पुस्तकाच्या अभ्यासातून तुम्हाला खरोखरच खूप मदत मिळेल. प्रत्येक अध्यायातल्या परिच्छेदांसाठी प्रश्न आहेत. यांमुळे तुम्हाला बायबलमध्ये सांगितलेल्या गोष्टी सहज व स्पष्ट रीत्या समजतील. कोट्यवधी लोकांना यहोवाच्या साक्षीदारांबरोबर बायबलचा अभ्यास केल्यामुळे फायदा झाला आहे. तसाच तुम्हालाही होईल, अशी आम्ही आशा करतो. हा अभ्यास करताना तुमच्यावर देवाचा आशीर्वाद असो!