NGA MU tanda umo mukanda ua mizimbu, mu tala TV, ni mu halakana ku cisandzi, mu ka mona na ku ivua mizimbu ya ingi ya vumbanditu, ndzita na vukenia. Ni halumo yenu mpundu mu li na ku yanda omo lia ku vavala cenu ni omo lia ku tsisa umo kavusoko kenu.

Lihulenu nguenu:

• Evi vikevio via tonda Njambi kuli yange na ku vusoko vuange ni?

• Kulihi nji hasa ku uana vukuasi mu ku lua na visoti viange?

• Tangua ku ka kala ciyulo ca vusunga ni?

Mbimbiliya ya hana vikumbululo via cili ku vihula viaco.

• Vantu ka va ka vavala naua, cipue ku kulupa ni ku tsa. —Ku-Solola 21:4

• “Cilema a ka tumbuka ngue ntava.”—Isaya 35:6

• “Meso a tupuputa a kemuka.”—Isaya 35:5

•  Vatsi tangua va ka sanguka.—Yoano 5:28, 29

• Na umo uahi a ka vavala naua.—Isaya 33:24

• “Meso a tupuputa a kemuka.”—Isaya 35:5

Ca casi ku singanieka ngecize vi mu na tanda ha mafo a ku putukila mu livulu lino via pua vilota via ngoco. Vunoni Njambi ua kulahesa ngecize vuovuno a ka neha evi viuma viaco hano ha mavu, kaha Mbimbiliya ya lombolola vati a ka lingamo.

Vunoni kati ovio lika ya lombolola Mbimbiliya. Ya tu leka naua vi tua pande ku tantekeya linga tu kale na ndzolela ya vusunga na ku yoya vuino mu ntsimbu ino vene. A ci singaniekenu kamandende ha viuma vie ku mi umisa mutima. Ngeci mua, vimbongo, visoti mu vusoko, ku vavala, ni ku-tsa ca muntu u mua lema cikuma. Mbimbiliya i hasa ku mi kuasa mu visoti evi, kaha i hasa naua ku mi lembezieka mu ku kumbulula vihula ngeci muevi:

• Vika tue ku yandela?

• Vati tu hasa ku lua na visoti vietu?

• Tu hasa ku yoya mu ndzolela ha ndzivo ni?

• Vika vie ku soloka ku muntu nga a tsa?

• Tangua tu ka mona naua vavusoko vuetu va tsa ni?

• Omo lia vika tu hasa ku kala na vusunga nguetu Njambi a ka puisamo viose via kulahesa?

 Ku tanda eli livulu ci muesa ngecize mu tonda ku tantekeya vi ya longesa Mbimbiliya. Eli livulu li mi kuasa mpundu. Muli vihula vi va kumbulula mu vinanga, vize vi ka mi kuasa ku ivuisisa vuino Mbimbiliya. Vantu vavengi va lema ku lilongesa Mbimbiliya na Vakaleho va Yehova. Tua lavelela ngecize nenu mu ka lema ku simutuila navo. Tua vundila linga Njambi a mi vezikise omo mu lilongesa Mbimbiliya!