ITECH periódico, televisión, radio uan Internet kiteixmatiltiaj ke semi mochiua tein amo kuali, ke onkak uejueyi neteuilismej uan ke kemansa sekin eliuis temijmiktiaj. Xa tejuatsin tiontajyouijtok porin tionmokokoua oso porin momikilij se mochankauj oso se akin kuali iuan tionmouikaya.

Xionmotajtani:

• ¿Ijkon kineki Dios maj tinemikan nejua uan nochankauan?

• ¿Kani uelis nikajsis tein nechpaleuis maj nikmati toni nikchiuas keman nikpanos ouijkayomej?

• ¿Se tonal onkas yolseuilis?

Biblia kitemaka tanankililmej tein uelis tikneltokaskej.

• Taltikpakneminij amo tajyouiskejok, amo ueuentsintiaskejok nion momikiliskejok (Apocalipsis 21:4).

• Akin amo uelij nejnemij ajkotsikuiniskej (Isaías 35:6).

• Akin amo tachiaj ixtajtapouiskej (Isaías 35:5).

•  Mikemej oksepa nemiskej (Juan 5:28, 29).

• Amo akin kokolispeuasok (Isaías 33:24).

• Nochin kipiaskej tein kikuaskej (Salmo 72:16).

Xa tikonnemilis ke tein tikonixtajtoltij achto amo mochiuas. Sayoj ke Dios kijtoj ke amo uejkaua kichiuas nochi nejon nikan taltikpak, uan Biblia kijtoua keniuj kichiuas.

Biblia no techiluia keniuj uelis tiyolpakiskej axkan. Tepitsin xiontanemili itech tein mitsontekipachoua. Xa nankipanotokej ouijkayomej kemej kalyetouanij, xa amo mitsonajsi tomin oso xa tionmokokoua. Oso xa tiontayokoxtok porin momikilij se mochankauj oso se akin kuali iuan tionmouikaya. Biblia uelis mitsonpaleuis xikonmati toni tikonchiuas keman tikonpanotos nejon ouijkayomej. Uan no uelis kichiuas xionyolseui, porin kinankilia netajtanilmej kemej nejin:

• ¿Keyej titajyouiaj?

• ¿Toni uelis tikchiuaskej keman tikpiaskej kuejmolmej?

• ¿Keniuj uelis tiyolpakiskej kemej kalyetouanij?

• ¿Toni techpanoua keman timomikiliaj?

• ¿Oksepa tikinitaskej tochankauan akin momikilijkejya?

• ¿Keyej uelis tikneltokaskej ke Dios kichiuas nochi tein kijtoj?

 Komo tejuatsin tikonixtajtoltijtok nejin amatajkuilol, kijtosneki ke tikonneki tikonmatis toni tamachtia Biblia. Nejin amatajkuilol mitsonpaleuis xikonmati. Moajsij netajtanilmej tein monankiliaj itech párrafos tein mitsonpaleuiskej okachi kuali xikonajsikamati tein Biblia kijtoua. Miakej taltikpakneminij semi kiuelitanij tajtoskej ika tein tamachtia Biblia iniuan itaixpantijkauan Jiova. Tikchiaj tejuatsin no xikonuelita. ¡Maj Dios mitsontatiochiui porin tionmochikaua tikonmatis toni tamachtia Biblia!