PAMUNOVERENGA phepha ro masoko, pamunovona terevhizau, kana pamunopurukira radhiyo, munovona no kuzwa zviitiko zvizinji zvo ugandanga, hondo, zve no uthyisijiri! Kangaije imwimwi muri kutambujika ngo pamusoro po ndhendha kana kufihwa ngo mundhu wamunoda.

Jibvunjisenyi kudari:

• Ndizvona zvinoda Mwari kwandiri no mbhuri yangu here?

• Ndingariwana kwapi besero, kuti ndihwisane no zvineso zvangu?

• Kunozowanikadi runyararo kamare here?

Bhaibheri rinopa mupinguro jinodakajisa jo mubvunjo iji.

• Vandhu avazohwajihwi, avazoiti harahwa, zve avazofi.​—Apokalipsi [Cakapangijihwa] 21:4

• “Bzigono bzinozophuka inga gono ro xoma.”​—Isaia 35:6

• “Majiso o mapofu anozopembenuka.”​—Isaia 35:5

•  Vakafa vanozoraramazve.​—Johani 5:​28, 29

• Apana anozohwaja.​—Isaia 33:24

• Mundhu wese anozova no zvokuha zvakawanda.​—Nduyo 72:16.

Zvingareruka kurangarira kuti zvatabvari kuverenga mu mapheji maviri aya, i kutorota hako. Asi Mwari wakagondesa kuita cinjo iji pasi pano sambi-sambi, zve Bhaibheri rinodurujira kuti iyena anozozviitisa kudini zvondhozvo.

Bhaibheri rinodurujira zvizinji maningi. Rinotibvunja zvatinodikana kuita kuti tive no mudakaro wokadi-kadi tecibusa upenyu wari uno. Amborangariranyi mukuvo wamakambova no zviro zvakamuthyisa. Kangaije zvingava zvineso zvomare kana zvineso zvo pambhuri, zvineso zvo uhomi, kana kufihwa ngo mudiwa. Bhaibheri ringamubesera kuti muhwisane no zvineso izvi, zve ringamutondhoja ngo kupingura mubvunjo jakadari inga iji:

• Ngenyi tinotambujika?

• Tingahwisana kudini no zvineso zvedu?

• Mbhuri yedu ingava inodakara here?

• Zvicinyi zvinoitika pa tinofa?

• Tinozovonazve vadiwa vedu vakafa here?

• Ngenyi tingava no cokwadi cokuti Mwari anozoita zvese zvaakagondesa?

 Kuverenga kwenyu bhuku iri, zvinovonesa kuti munoda kuziva zvinojijisa Bhaibheri. Bhuku iri rinozomubesera. Irona rinomubvunjo jo ndima, jinozomubesera kuzwisisa ushoni Bhaibheri. Vandhu vakawandisisa vari kudakajihwa ngo kubhuisana ngo pamusoro po Bhaibheri no Zvapupu zva Jehovha. Tinovetera kuti imwimwi munozodakajihwavo. Mwari ngaamukomborere pamunonga mecifumbhura zvamungajijiswa ngo Bhaibheri!