CI IE ore nge kore ta journal? Nge kore ta nata bua ci taedrehngi ri télévision ne ri radio? Ta nata ri pon’ ore ci atangoni ngom, ci irue ne terrorisme. Ka bua ngei ci sheusheu tan’ ore bua ci uedr, ca ngei o se ngome bua ci hnorone ha tango.

Dai ua roionelo ore nodei hneng’ om:

• Ilo, alatone ni Madaru bane so inu ne fami ni inu komelei?

• Inu co uni il’ ore ne ekonekatu bane sere etha ne il’ ore nodei ushiwa ni inu?

• Ilo, ri se rane ha co numu dongodongo ome ri ten?

Tusi Hmijoc ci kanon’ ore ta ne cedi me ekowe son’ ore ta hneng’ omelei.

• Ngome ha deko yawe co sheusheu, Se ha deko co mohma ne se ha deko co tango.​—Ahngabot 21:4

• “Ile me co waeotelo ko re karegoce inom’ o re aila (dria).”​—Isaia 35:6

• “Ta namanashene ha co ule yawe.”​—Isaia 35:5

•  Ha co roilo yawe kore ta tango.​—Ioane 5:28, 29

• Deko se ngome co uedre yawe.​—Isaia 33:24

• Ileoden’ ore ngome ha co numu hmaiai kore kodraru.​—Ta Salamo 72:16

Bua ngei co uane ko, ore nodei hna ie koda ri pages 4 ne 5 nore gu tusi’om, melei tutuo so me roi. Roidi Madaru ci ie sesekone ko Nubonengo ha bathu aiuni ore nodei hna ie koda omelei. Ka Tusi Hmijoc ci ie ahngane ko korione kei Madaru co aiuni omelei.

Ke numu se ace me thawalane Tusi Hmijoc ci ie. Tusi Hmijoc ci ie du eje ko korione ke eje co nidi opodone whan’ onom. Dai uanelo ke bua ore ta ushiwa ni bua onom. Melei ngei ore uedr? Ca ngei ore ta ushiwa ri fami? Ca ngei ore ta deko kan’ o mane? Ca ngei o se kani bua ci hnorone ha tango? Tusi Hmijoc thuni co konekatu bua co sere etha ne il’ ore nodei ushiwa omelei. Tusi Hmijoc se ci kanone joko ore ta ne cedi bane aopodoneni bua, ta ne cedi son’ ore nodei hnenge om:

• Wen’ ore nge eje ci jo?

• Korione ke eje co sere etha ne il’ ore nodei ushiwa ni ej?

• Korione kore fami ni eje thuni co opodon?

• Eje ci nge di thubenelo ore hna tango?

• Ilo, eje thuni co ule yawe ore ta ngome eje ci hnorone ma ha tango?

• Wen’ ore nge eje thuni co ua sesekone ko Madaru co aiuni ore nodei ace hnei Nubonengo hna ie koda?

 Ngei bua ma ieie ore gu tusi’ om, melei ci aehngeni ko bua ci alane co carajewe ore ci yenone kei Tusi Hmijoc. Ore gu tusi ome co konekatu bua. Son’ ore nodei paragraf, numu ta hnenge co konekatu bua co carajewe roion’ ore Tusi Hmijoc. Ta millions kore ngome ci didione co ethanatati ore Tusi Hmijoc ne ta Témoins ni Iehova. Ehnije ci uroione ko bua joko se co opodone co rue inomelei. Ka pani Madaru co hnahneon’ ore nodei ruace bua ci taceti, ha thu carajewe ore ci yenone kei Tusi Hmijoc!