Kansi Mulungu ali na Cholinga chotyani kuli sewo?
MUKAŴELENGA nyuzipepala, mukalolela TV, olo mukamvwishila pa wailesi, muwona, na kumvwa nkhani zinyinji zokhuza unyankapondo, nkhondo na kufwaya malamulo. Payakine muvutika chifukwa cha matenda olo chifukwa chakuti munthu wemwenzekonda emwalila.
Likonsheni kuti:
-
Kansi Mulungu ofuna kuti moyo wangu na wa banja yangu unkhale woteti?
-
Kansi ningafwane kuni thandizo kuti nikwanishe kulimbana na mavuto ŵanukumana nawo?
-
Kansi pali chiyembekezo chilichonse chakuti ŵanthu azankhale mu ntendele ngawo-ngawo pano pachalo?
Baibolo yupeleka mayankho okata ntima pa makonsho amene aŵa.
BAIBOLO YUPHUNZISA KUTI MULUNGU AZACHITE VINTHU VIWEME NGAKO PANO PACHALO.
-
Kukaŵeve voŵaŵa ndipo ŵanthu akokalambalini olo kufwa.—Chivumbulutso 21:4
-
“Munthu wolemala azakwele lupili monga ni mwakuchitila baŵala munalume.”—Yesaya 35:6
-
“Menso a ŵanthu asalolesha azaseguliwe.”—Yesaya 35:5
-
Ŵanthu echifwa azaushiwe.—Yohane 5:28, 29
-
Paliye ati akolwala.—Yesaya 33:24
-
Munthu aliyense pachalo azankhale na vakulya vokwanila.—Salimo 72:16
PINDULANI NA VAYUPHUNZISA BAIBOLO
Kungankhale kosavuta kuganizila kuti vinthu vamwaŵelenga pa mapedji oyambilila m’buku ino ni maloto tyala. Koma Mulungu niye walonjeza kuti achinje vinthu pachalo kwalombapano, ndipo Baibolo yufotokoza mwati azachitile vamene ivi.
Koma Baibolo yutiujalini tyala vati azachite Mulungu. Yutiujasoti vatufunikila kuchita kuti tinkhale okondwela nosangalala na moyo olo lomba teti. Ganizilani za vinthu vukuchitishani nkhaŵa. Vinthu vamene ivi vingayangijilepo mavuto a zachuma, mavuto a m’banja, matenda olo imfwa ya munthu wemwenzekonda. Baibolo ingakuyavyeni kulimbana na mavuto amene aŵa ndipo ingakutonthojeni poyankha makonsho monga ni aŵa:
-
Kansi vingakwanishike kuzawonana nawosoti abale ŵasu ŵala emwalila?
-
Kansi tingasimikije tyani kuti Mulungu azakwanilishe vinthu vawalonjeza kuzachita kusogolo?
Kuŵelenga kwanu buku ino kuwonesha kuti mufuna kuziŵa vayuphunzisa Baibolo. Buku ino ikuyavyeni. Ndime iliyonse ili na konsho yake, ndipo makonsho amene aŵa akuyavyeni kuimvwisha bwino Baibolo. Ŵanthu mamiliyoni ankhala osangalala kuphunzila Baibolo na Mboni za Yehova. Tukhulupilila kuti namwe munkhale osangalala. Tukufunilani madaliso a Mulungu pamwayamba kuphunzila Baibolo!