GE O bala kuranta, o bogela thelebišene, goba o theetša radio, o bona le go kwa ditaba tše dintši tša bosenyi, dintwa le botšhošetši. Mohlomongwe gona bjale o a tlaišega ka baka la ge o babja goba ka gobane motho yo o mo ratago a hwile.

Ipotšiše gore:

• Na se ke seo Modimo a nyakago gore se wele nna le ba lapa la ka?

• Nka hwetša kae thušo ya go lebeletšana le mathata a ka?

• Na mo lefaseng go tla ka gwa ba le khutšo ya kgonthe?

Beibele e araba dipotšišo tšeo ka mo go kgotsofatšago.

• Batho ba ka se sa kwa bohloko, ba tšofala goba go hwa.​—Kutollo 21:4

• “Sehlotša se tlo taboga bjalo ka kgama.” ​—Jesaya 35:6

• “Mahlo a difofu a tla buduloga.” ​—Jesaya 35:5

•  Bahu ba tla tsošwa. ​—Johane 5:28, 29

• Ga go na yo a tlago go babja.​—Jesaya 33:24

• Batho ka moka ba tla hwetša dijo tše dintši.​—Psalme 72:16

Go ka ba bonolo go nagana gore seo o se badilego matlakaleng a sego kae a mathomo a puku ye ke toro feela. Eupša Modimo o holofeditše gore kgauswinyane o tla dira diphetogo tšeo mo lefaseng, gomme Beibele e hlalosa kamoo a tlago go di dira ka gona.

Beibele e hlalosa le dilo tše dingwe. E re botša dilo tšeo re swanetšego go di tseba e le gore re thabe e le ka kgonthe le go ipshina ka bophelo gona bjale. Anke o nagane go se nene ka dilo tšeo di go tshwenyago. Dilo tšeo di ka akaretša tšhelete goba mathata a lapa, bolwetši goba go hwelwa ke motho yo o mo ratago. Beibele e ka go thuša gore o lebeletšane le mathata a, e bile e ka go homotša ka go araba dipotšišo tše bjalo ka tše:

• Ke ka baka la’ng re tlaišega?

• Re ka dira’ng gore re kgone go lebeletšana le mathata a rena?

• Na lapa la gago le ka thaba?

• Go direga’ng ka rena ge re ehwa?

• Na re tla ka ra bona gape baratiwa ba rena bao ba hwilego?

• Ke ka baka la’ng re ka kgodišega gore Modimo o tla dira dilo ka moka tšeo a di holofeditšego?

 Taba ya gore o bala puku ye e bontšha gore o nyaka go tseba seo Beibele e se rutago. Puku ye e tla go thuša. Dirapa ka moka di na le dipotšišo tšeo di tlago go go thuša go kwešiša Beibele gakaone. Batho ba dimilione ba thabetše go ithuta Beibele le Dihlatse tša Jehofa. Re holofela gore le wena o tla thabela go ithuta le tšona. Anke Modimo a go šegofatše ge o dutše o ithuta seo Beibele e se rutago!